திண்டுக்கல் மாவட்டத்தில் மு.க. ஸ்டாலின் பிறந்த நாள் விழா

திண்டுக்கல் மாவட்டத்தில் தமிழக முதல்வரும், திமுக தலைவருமான மு.க. ஸ்டாலின் பிறந்த நாளை அந்தக் கட்சியினர் சனிக்கிழமை கொண்டாடினர்.

- 

திண்டுக்கல்/ஒட்டன்சத்திரம்/பழனி/நத்தம்/நிலக்கோட்டை, மார்ச் 1:

இதையொட்டி, திண்டுக்கல் மாவட்ட திமுக சார்பில் விளையாட்டுப் போட்டிகள், நலத்திட்ட உதவிகள் வழங்கும் நிகழ்ச்சிகள் நடைபெற்றன. இதன் ஒரு பகுதியாக, திண்டுக்கல் அரசு மருத்துவமனையில் சனிக்கிழமை பிறந்த 18 குழந்தைகளுக்கு தலா ஒரு கிராம் தங்க மோதிரம் வழங்கும் நிகழ்ச்சி நடைபெற்றது. இந்த நிகழ்ச்சிக்கு மாவட்டச் செயலரும், சட்டப் பேரவை உறுப்பினருமான பெ. செந்தில்குமார் தலைமை வகித்து, 18 குழந்தைகளுக்கும் தங்க மோதிரத்தை அணிவித்தார். இந்த நிகழ்வில் மேயர் இளமதி, மாநகரச் செயலர் ராஜப்பா, ஒன்றியச் செயலர் வெள்ளிமலை, மாநகர பொருளாளர் சரவணன், பகுதிச் செயலர் பஜ்லுல் ஹக் உள்ளிட்டோர் கலந்து கொண்டனர்.

இதே போல, திண்டுக்கல் மாவட்ட திமுக அலுவலகத்தில் கட்சி கொடியேற்றி இனிப்பு வழங்கப்பட்டது. இதைத் தொடர்ந்து தொண்டர்களுக்கு வேஷ்டி, பரிசுப் பொருள்கள் வழங்கப்பட்டன. பிறகு தொண்டர்களுக்கும், பொதுமக்களுக்கும் சைவ பிரியாணி விருந்து அளிக்கப்பட்டது. மேலும், சிறுவர்களுக்கான விளையாட்டுப் போட்டிகள் நடத்தப்பட்டு, வெற்றி பெற்றவர்களுக்கு பரிசுகள் வழங்கப்பட்டன. முன்னதாக 'தமிழ்நாடு போராடும், தமிழ்நாடு வெல்லும்' என திமுகவினர் உறுதிமொழி எடுத்துக் கொண்டனர். இந்த நிகழ்வுக்கு திமுக மாநகரச் செயலர் ராஜப்பா தலைமை வகித்தார். மேயர் இளமதி, அவைத் தலைவர் காமாட்சி ஆகியோர் முன்னிலை வகித்தனர். இந்த நிகழ்ச்சியில் துணைச் செயலர் நாகராஜன், பொருளாளர் சத்தியமூர்த்தி, மாநகரப் பொருளாளர் சரவணன் உள்ளிட்ட பலர் கலந்து கொண்டனர்.