பிளஸ் 1 தேர்வில் 91.17% தேர்ச்சி

கோவை மாவட்டம் முதலிடம்

தமிழகத்தில் மாநில பாடத்திட்டத்தில் பிளஸ் 1 வகுப்பு பொதுத் தேர்வில் 91.17 சதவீத மாணவ, மாணவிகள் தேர்ச்சி பெற்றுள்ளனர். குறிப்பாக, மாணவர்களைவிட 7.43 சதவீத மாணவிகள் அதிகம் தேர்ச்சி பெற்றுள்ளனர்.

மாவட்ட அளவிலான ஒட்டுமொத்த பள்ளிகளின் தேர்ச்சியில் கோவை- 96.02 சதவீததேர்ச்சியுடன் முதலிடம் பிடித்துள்ளது. 81.40 சதவீத தேர்ச்சியுடன் வேலூர் கடைசி இடத்தைப் பிடித்துள்ளது.

தமிழகத்தில் பிளஸ் 1 பொதுத் தேர்வு மார்ச் 4 முதல் 25-ஆம் தேதிவரை நடை பெற்றது. இத்தேர்வு முடிவுகள் செவ்வாய்க்கிழமை வெளியிடப்பட்டன.

பொதுத் தேர்வை 4 லட்சத்து 26 ஆயிரத்து 821 மாணவிகள், 3 லட்சத்து 84,351 மாணவர்கள் என மொத்தம் 8 லட்சத்து 11 ஆயிரத்து 172 பேர் எழுதினர். அதில், தற்போது 4 லட்சத்து 4,143 மாணவிகள் (94.69%), 3 லட்சத்து 35 ஆயிரத்து 396 மாணவர்கள் (87.26%) தேர்ச்சி பெற்றுள்ளனர்.

ஒட்டுமொத்த தேர்ச்சி (91.17) கடந்த ஆண்டைக் காட்டிலும் (90.93) 0.24 சதவீதம் அதிகரித்துள்ளது.