மாநிலங்கள் வளர்ந்தால் நாடு வளரும்: பிரதமர் மோடி

மாநிலங்களின் வளா்ச்சி மூலம் நாடு வளா்ச்சியடைவதாக பிரதமா் மோடி தெரிவித்துள்ளாா்.

விரைவில் மக்களவைத் தோ்தல் நடைபெற உள்ள நிலையில், நாட்டின் பல்வேறு பகுதிகளுக்குப் பிரதமா் மோடி தொடா் பயணம் மேற்கொண்டு வருகிறாா். இந்நிலையில், தெலங்கானா மாநிலம் ஆதிலாபாதில் ரூ.56,000 கோடிக்கும் அதிகமான மதிப்புகொண்ட மின்சாரம், ரயில், சாலைப் போக்குவரத்துத் துறை சாா்ந்த வளா்ச்சித் திட்டங்களை பிரதமா் மோடி திங்கள்கிழமை தொடங்கிவைத்தாா். 

பின்னா் அவா் பேசியதாவது: கடந்த காலாண்டில் 8.4 சதவீதம் வளா்ச்சியை எட்டி, பெரும் பொருளாதார மதிப்பு கொண்ட நாடு என்ற சிறப்பை உலகிலேயே இந்தியா மட்டும்தான் அடைந்துள்ளது. இந்த வளா்ச்சி விகிதமே கடந்த 3, 4 நாள்களாக உலக முழுவதும் விவாதப் புள்ளியாக இருந்தது. இதே வேகத்தில் வளா்ச்சி நீடித்தால், உலகில் பொருளாதார ரீதியாக முன்னணியில் உள்ள நாடுகளில் இந்தியா 3-ஆவது இடத்தைப் பிடிக்கும்.

மத்தியில் பாஜக ஆட்சியமைத்தும், தெலங்கானா மாநிலம் உருவாகியும் 10 ஆண்டுகள் நிறைவடைந்துள்ளது. தெலங்கானாவுக்கு தேவையான அனைத்து உதவிகளையும் மத்திய அரசு செய்து வருகிறது.