அமைச்சர் செந்தில் பாலாஜியிடம் விசாரணை

அமலாக்கத் துறைக்கு உச்சநீதிமன்றம் அனுமதி

தமிழகத்தில் முந்தைய ஆட்சியில் அமைச்சராக இருந்த போது, போக்குவரத்துத் துறையில் வேலை வாங்கித் தருவதாக மோசடியில் ஈடுபட்டதாக புகாருக்கு உள்ளான வி.செந்தில் பாலாஜி தொடர்புடைய மேல்முறையீடு வழக்கில், அமலாக்கத் துறையின் விசாரணைக்கு அனுமதி அளித்து உச்சநீதிமன்றம் செவ்வாய்க்கிழமை தீர்ப்பளித்தது.

இது தொடர்பாக சென்னை உயர்நீதிமன்றத்தின் டிவிஷன் அமர்வு பிறப்பித்த உத்தரவை உச்சநீதிமன்றம் ரத்து செய்தது. இந்த விவகாரத்தை விசாரித்த நீதிபதிகள் கிருஷ்ண முராரி, வெ.ராமசுப்பிரமணியன் ஆகியோர் அடங்கிய அமர்வு மேற்கண்ட தீர்ப்பை அளித்துள்ளது.

2014-ஆம் ஆண்டின்போது போக்குவரத்துத் துறையில் வேலை வாங்கித் தருவதாக பணம் பெற்று மோசடியில் ஈடுபட்டதாக புகாருக்கு உள்ளான அப்போதைய போக்குவரத்துத் துறை அமைச்சராக இருந்தவரும் தற்போதைய மின்துறை அமைச்சருமான செந்தில் பாலாஜி உள்ளிட்டோருக்கு எதிரான வழக்கை ரத்து செய்து சென்னை உயர்நீதிமன்றம் 30.7.2021-இல் உத்தரவிட்டிருந்தது.