ஜி20 தலைமை மிகப்பெரும் வாய்ப்பு

பிரதமர் நரேந்திர மோடி

புது தில்லி, நவ. 27: முக்கியத்துவம் வாய்ந்த ஜி20 கூட்டமைப்புக்கு தலைமை ஏற்பது இந்தியாவுக்கு கிடைத்த மிகப் பெரும் வாய்ப்பு; சர்வதேச நலனை முன்னிறுத்தி இந்தியா செயல்படும்' என ‘மனதின் குரல்’ நிகழ்ச்சியில் பிரதமர் நரேந்திர மோடி தெரிவித்தார்.

மாதந்தோறும் கடைசி ஞாயிற்றுக்கிழமையில் பிரதமர் மோடி ‘மனதின் குரல்’ என்ற நிகழ்ச்சியில் வானொலி வாயிலாக உரையாற்றி வருகிறார். நடப்பு மாதத்துக்கான நிகழ்ச்சியில் அவர் கூறியதாவது: உலகின் மூன்றில் இரண்டு பங்கு மக்கள் ஜி20 கூட்டமைப்பு நாடுகளில் வசிக்கின்றனர். நான்கில் மூன்று பங்கு வர்த்தகம் அந்த நாடுகளிலேயே நடைபெறுகிறது.

உலகின் ஒட்டுமொத்த பொருளாதார மதிப்பில் 85 சதவீத பங்களிப்பை ஜி20 நாடுகளே வழங்கி வருகின்றன. அத்தகைய வலிமைமிக்க கூட்டமைப்பின் தலைமைப் பொறுப்பை டிசம்பர் 1ஆம் தேதியில் இருந்து இந்தியா ஏற்கவுள்ளது.

இது இந்தியாவுக்கும் இந்தியர்களுக்குமான மிகப் பெரிய வாய்ப்பு. இந்தியா 75-ஆவது சுதந்திர ஆண்டைக் கொண்டாடியுள்ள நிலையில் ஜி20 தலைமைப் பொறுப்பு வழங்கப்பட்டுள்ளது மேலும் சிறப்புக்குரியது. சர்வதேச நலனையும் உலக மக்களின் நலனையும் மையப்படுத்தி ஜி20 கூட்டமைப்பை இந்தியா வழி நடத்தும்.

சுற்றுச்சூழல், நீடித்த வளர்ச்சி, பருவநிலை மாற்றம், அமைதி உள்ளிட்ட பல்வேறு சவால்களை உலகம் தற்போது சந்தித்து வருகிறது. அந்த சவால்களுக்கு தீர்வு காணும் வகையில் ஜி20 கூட்டமைப்பின் தலைமைப் பொறுப்பை ஏற்று இந்தியா செயல்படும். அனைவருக்குமான நலன், அனைவருக்குமான அமைதி ஆகியவற்றை மையமாகக் கொண்டு இந்தியா செயல்படும்.