ராஜீவ் காந்தி அறக்கட்டளைகளின் உரிமம் ரத்து

காங்கிரஸ் முன்னாள் தலைவர் சோனியா காந்தி தலைமைவகித்து வரும் ராஜீவ் காந்தி ஃபவுண்டேஷன் மற்றும் ராஜீவ்காந்தி தொண்டு நிறுவனம் ஆகியவற்றுக்கான வெளிநாட்டு நன்கொடை உரிமங்களை மத்திய உள்துறை அமைச்சகம் ரத்து செய்துள்ளது.

புது தில்லி, அக். 23: இது தொடர்பாக மத்திய உள்துறை அமைச்சக அதிகாரி ஒருவர் கூறுகையில், 'ராஜீவ் காந்தி ஃபவுண்டேஷன், ராஜீவ் காந்தி தொண்டு நிறுவனம் ஆகியவை வெளிநாட்டு நன்கொடை ஒழுங்குமுறைச் சட்டத்தின் விதிகளை மீறியதாகக் குற்றச்சாட்டு எழுந் தது. இது தொடர்பாக விசாரணை நடத்த கடந்த 2020-ஆம் ஆண்டு அமைச்சகங்களுக்கு இடையேயான குழு அமைக்கப்பட்டது. அக்குழு நடத்திய விசாரணையில் தன்னார்வ தொண்டு நிறுவனங்களின் விதிமீறல் உறுதி செய்யப்பட்டது.

வெளிநாட்டு நன்கொடைகள் தொடர்பான பல்வேறு ஆவணங்களை முறையாக சமர்ப்பிக்காமல் இருத்தல், வருமான வரி கணக்குகளை முறையாகத் தாக்கல் செய்யாமல் இருத்தல், வெளிநாட்டு நன்கொடைகளை முறையின்றி பயன்படுத்துதல், சீனா உள்ளிட்ட நாடுகளில் இருந்து பணமோசடியில் ஈடுபடுதல் உள்ளிட்ட குற்றச்சாட்டுகள் அந்த அறக்கட்டளைகளுக்கு எதிராக உறுதி செய்யப்பட்டன. அதையடுத்து இரு அறக்கட்டளைகளின் வெளிநாட்டு நன்கொடை உரிமங்களும் ரத்து செய்யப்பட்டுள்ளன' என்றார்.

வெளிநாட்டு நன்கொடை உரிமம் ரத்து செய்யப்பட்டுள்ள இரு தன்னார்வ நிறுவனங்களுக்கும் சோனியா காந்தி தலைவராக இருந்து வருகிறார். ராஜீவ் காந்தி ஃபவுண்டேஷன் என்னும் அறக்கட்டளையில் முன்னாள் பிரதமர் மன்மோகன் சிங், முன்னாள் மத்திய நிதியமைச்சர் ப.சிதம்பரம், காங்கிரஸ் எம்.பி. ராகுல் காந்தி, கட்சியின் பொதுச் செயலர் பிரியங்கா, மான்டேக் சிங் அலுவா லியா, சுமன் துபே, அசோக் கங்குலி ஆகியோர் உறுப்பினர்களாக உள்ளனர்.

ராஜீவ் காந்தி தொண்டு அறக்கட்டளை நிறுவனத்தில் ராகுல் காந்தி, அசோக் கங்குலி, மன்ஸி மேத்தா, தீப் ஜோஷி ஆகியோர் உறுப்பினர்களாக உள்ளனர்.