முதல்வாக்கு யாருக்கு இந்த கதியா?

இந்தியா போன்ற பல இன மொழி கொண்ட ஒன்றியத்தில் மாநிலங்களுக்கு சுயாட்சி உரிமை அவசியம். அமெரிக்க ஐக்கிய நாட்டில் மாகாணங்களுக்கு சுயராஜ்யமான பல உரிமைகள் வழங்கப்பட்டுள்ளதோடு, சுயேட்சையாக இயங்குவதற்கு பல வழிமுறைகளும் உள்ளன. இதனால் அங்கு தேசப்பற்றும் மிகுந்து காணப்படுகிறது. ஆனால், இந்தியாவில் மாநில உரிமை பறிக்கப்பட்டு, இங்குள்ள அரசுகள் ஒடுக்கப்படுகின்றன. அதிலும் ஒன்றிய பிரதேசம் என்றால் மிகவும் மோசம். அங்கு காவல்துறை கூட மாநில அரசின் கைகளில் இருப்பதில்லை. மக்களால் தேர்ந்தெடுக்கப்பட்ட முதல்வரை விட, ஒன்றிய அரசால் நியமிக்கப்பட்ட ஆளுநர் அதிகாரம் கொண்டவராக விளங்குகிறார்.

- 

இதனால் டெல்லி, புதுவை மாநிலங்களில் அனைத்து அரசியல் தலைவர்களும் பொறுமை கொண்டிருக்கும் சூழலில், காஷ்மீரில் முதல்வருக்கே கசப்பான அனுபவம் நிகழ்ந்துள்ளது.

காஷ்மீரில் கடந்த 1931, ஜூலை 13-இல் மகாராஜா ஹரிசிங்கின் ஆட்சிக்கு எதிராக போராட்டம் நடந்தபோது டோக்ரா ராணுவம் நடத்திய துப்பாக்கிச்சூட்டில் 22 பேர் இறந்தனர். இந்த நாள் ஒவ்வொரு ஆண்டும் தியாகிகள் தினமாக அனுசரிக்கப்பட்டு வருகிறது. அன்று அரசு விடுமுறை நாளாகவும் இருந்தது. ஆனால் கடந்த 2019-இல் ஜம்மு காஷ்மீருக்கான சிறப்பு அந்தஸ்து ரத்து செய்யப்பட்ட பிறகு பொது விடுமுறை பட்டியலில் இருந்து இந்நாள் நீக்கப்பட்டதோடு தியாகிகள் கல்லறையில் நிகழ்ச்சிகள் நடத்தவும் தடை விதிக்கப்பட்டது.

இந்நிலையில் ஸ்ரீநகரில் உள்ள தியாகிகள் கல்லறையில் அஞ்சலி செலுத்த வந்த முதல்வர் உமர் அப்துல்லாவை நேற்று காவலர்கள் தடுத்தனர். இதையடுத்து உமர் அப்துல்லா சுவர் ஏறிக் குதித்து சென்று கல்லறையில் அஞ்சலி செலுத்தினார்.