દ્વારકા જ્યારે બન્યું ગોકુળિયું

નાતાલના માહોલ વચ્ચે દ્વારકા નગરી કાનુડાની રાસલીલામાં લીન બની. અવસર જન્માષ્ટમી કે નવરાત્રિ પર્વનો નહોતો છતાં ૫૦ હજાર જેટલી આહીરાણીઓએ પરંપરાગત વસ્ત્ર પરિધાન અને સુવર્ણ અલંકારો સાથે મહારાસ રમીને પાંચ હજાર વર્ષનો ઈતિહાસ જીવંત કર્યો.

- પાર્થ સુખપરિયા

વહેલી સવારે સૂર્યનું કિરણ ધરતી પર પડે વ એ પહેલાં શ્રીકૃષ્ણની કર્મભૂમિ દ્વારકા પાસેના વિશાળ ગ્રાઉન્ડમાં પરંપરાગત વેશભૂષા અને સુવર્ણ આભૂષણો સાથે આહીરાણીઓનું આગમન થઈ ગયું. કાના સંગ રાસના ભાવથી રંગાયેલી આ હજારો મહિલાઓએ તાલબદ્ધ મહારાસનો આરંભ કર્યો ત્યારે યદુવંશની રાજધાની દ્વારકા જાણે ગોકુળ બની ગઈ. જાણે પાંચ હજાર વર્ષ પ્રાચીન ઈતિહાસ જીવંત થયો. કાનવેલી આ ગોપીઓના પરંપરાગત રાસ જોઈને સૌકોઈ મંત્રમુગ્ધ બન્યા અને સાથે ઈતિહાસ રચાઈ ગયો.

આ રૂડો અવસર હતો અખિલ ભારતીય આહીર મહિલા મંડળ દ્વારા મહારાસના વિરાટ આયોજનનો. સમાજના આંગણે ઊજવાતા આ પ્રસંગને પોતાનો ગણીને ૩૭,૦૦૦થી વધુ આહીરાણીઓએ ઉત્સાહભેર ભાગ લઈને પોતાની પ્રાચીન પરંપરાનો પરિચય આપીને આજની પેઢીને એકતાનો સંદેશ પણ પહોંચાડ્યો. નાત-જાત અને રાજકીય વાડાબંધીને બાજુ પર રાખીને આખા સમાજે એક થઈને ભવ્ય રાસના આ ધર્મમય આયોજનને ઐતિહાસિક બનાવ્યું. આહીર-યાદવ સમાજના દોઢ લાખ જેટલા લોકો સમગ્ર વિશ્વભરમાંથી આ અવસરે આવ્યા હતા.

તમે રમવા આવો મહારાસ, ઓ દ્વારિકાના નાથ..., ઓ રંગ રસિયા ક્યાં રમી આવ્યા રાસ જો..., મહારાસ રમવા માધવ આવ્યા..., આજની ઘડી તે રળિયામણી... જેવાં ૩૭ પરંપરાગત લોકગીત-ગરબા પર સવારે પાંચ વાગ્યે બ્રહ્મમુહૂર્તમાં આ મહારાસ શરૂ થયો અને એ બે કલાકથી પણ વધુ સમય ચાલ્યો. આશરે પાંચ કિલોમીટરના વ્યાસમાં, ૬૮ વર્તુળમાં પચાસ હજારથી પણ વધુ આહીરાણીઓએ મહારાસ રજૂ કર્યા બાદ એક મૌન રૅલી રૂપે દ્વારકાધીશના મંદિરે જઈ આ મહારાસ શ્રીકૃષ્ણને અર્પણ કર્યો હતો.