സ്വയംഭോഗം സെക്സിന്റെ വാതിൽ

സ്വയംഭോഗം പാപമല്ല, മറിച്ച് സ്വാഭാവിക ലൈംഗികവളർച്ചയുടെ ഭാഗമാണ്. ആരോഗ്യകരമായ ലൈംഗിക ജീവിതത്തിന്റെ ഭാഗമാണ് സ്വയംഭോഗവും. എന്നാൽ നിരവധി അബദ്ധ ധാരണകൾ സ്വയംഭോഗത്തെ കുറിച്ച് നിലനിൽക്കുന്നുണ്ട്

സ്വയംഭോഗം പാപമാണെന്നും, അത് ചെയ്യുന്നത് മൂലം വന്ധ്യതയും മാനസിക പ്രശ്നങ്ങളും ഉണ്ടാകാൻ സാധ്യതയുണ്ടെന്നും ഒരു മെഡിക്കൽ കോളേജ് അദ്ധ്യാപകൻ ആത്മീയത പ്രചരിപ്പിക്കുന്ന ചാനലിൽ പറയുന്ന വീഡിയോ കണ്ടു. സ്വയംഭോഗവുമായി ബന്ധപ്പെട്ട മിഥ്യാ ധാരണകൾ ഊട്ടിയുറപ്പിക്കുന്നതും ആധികാരികത തോന്നിപ്പിക്കുന്നതുമാണ് ഈ വീഡിയോ.

ഇത്രയൊക്കെ ലോകം വളർന്നിട്ടും സ്വയംഭോഗം മോശമായ പ്രവൃത്തിയാണെന്ന് തന്നെയാണ് പലരും തെറ്റിദ്ധരിക്കുന്നത്. 1994ൽ സ്വയംഭോഗം സംബന്ധിച്ച വിവരങ്ങൾ സ്കൂൾ കരിക്കുലത്തിന്റെ ഭാഗമാക്കണം എന്ന് അഭിപ്രായപ്പെട്ടതിന്റെ പേരിൽ അമേരിക്കൻ സർജൻ ജനറൽ ആയിരുന്ന ജോയ്സേലിൻ എൽടെഴ്സിന് സ്ഥാനം ഒഴിയേണ്ടി വന്നിട്ടുണ്ട്. ഇനിയെങ്കിലും ഈ കാഴ്ചപ്പാടുകൾ മാറണം. സ്വയംഭോഗം പാപമാണെന്നു പറഞ്ഞു പഠിപ്പിക്കുന്ന മാതാപിതാക്കൾ കുട്ടികളുടെ ലൈംഗികതയിൽ വിനാശകരമായി കടന്നുകയറുകയാണ് എന്നാണ് മിഷൽ ഫുക്കോ പറഞ്ഞിട്ടുള്ളത്. അതുകൊണ്ട് നമ്മൾക്കും മാറാൻ ശ്രമിക്കാം. സുരക്ഷിതമായ ലൈംഗികതയെ കുറിച്ച് പഠിക്കാനും പറഞ്ഞു കൊടുക്കാനും ശ്രമിക്കാം.

പല മത വിശ്വാസങ്ങളും സാമൂഹിക കാഴ്ചപ്പാടുകളും ഈ വിഷയത്തെ സംബന്ധിച്ച അബദ്ധധാരണകൾ പടരാൻ കാരണമായിട്ടുണ്ട്. ആധുനിക വൈദ്യശാസ്ത്രത്തിന് ഈ വിഷയത്തിലുള്ള കാഴ്ചപ്പാട് എന്താണെന്ന് പറയാൻ ഇതു തന്നെയാണ് ഉചിതമായ സമയം.

എന്താണ് സ്വയംഭോഗം?

ഒരു വ്യക്തി തന്റെ തന്നെ ലൈംഗിക അവയവങ്ങൾ സ്വയമോ മറ്റൊരാളുടെയോ വസ്തുക്കളുടെയോ സഹായത്തോടെയോ, ഉദ്ദീപിപ്പിച്ച് ലൈംഗിക സുഖം അനുഭവിക്കുന്ന പ്രക്രിയയാണ് സ്വയംഭോഗം. ഇതുവഴി പലർക്കും രതിമൂർച്ഛയും ഉണ്ടാകാറുണ്ട്.

സ്വയംഭോഗം ചരിത്രത്തിൽ