നിങ്ങളെന്നെ നടനാക്കി

അധ്യാപികമാരുടെ പടംവരച്ച് പത്തിൽ തോറ്റ എരഞ്ഞിക്കൽ ശശിയെ, അപ്പുണ്ണി ശശിയാക്കിയത് നാടകമാണ്. പാലേരി മാണിക്യത്തിലൂടെ ബിഗ്സ്ക്രീനിലേക്കെത്തിയ ശശി, മമ്മൂട്ടി ചിത്രം പുഴുവിലൂടെ വീണ്ടും കൈയടി നേടി. നാടകവും സിനിമയും നിറഞ്ഞ ശശിയുടെ ജീവിതത്തിലേക്ക്...

- സൂരജ് സുകുമാരൻ

ഇടവപ്പാതി ചാറുന്ന പകൽ, കോഴിക്കോട് മാനാഞ്ചിറയുടെ ഓരങ്ങളിലൂടെ കാർ ടൗൺഹാളിലേക്ക് പായുമ്പോൾ എങ്ങു നിന്നോ ഒരു മഴക്കാറ്റ് വന്നു പൊതിഞ്ഞു. ടൗൺഹാളിന് മുന്നിലിറങ്ങിയതും ഭൂതകാലത്തിന്റെ കരിമ്പടം അപ്പുണ്ണി ശശിയെ വന്ന് പൊതിഞ്ഞു. ആളൊഴിഞ്ഞ കസേരകൾക്കിടയിൽനിന്ന് അപ്പുണ്ണി ശശി ഉറക്കെപ്പറഞ്ഞു, “ഈ തട്ടാണ് എന്റെ ജീവനും ജീവിതവും”. നാടകങ്ങളാണ് എരഞ്ഞിക്കൽ ശശിയെ അപ്പുണ്ണി ശശിയാക്കിയതും പിന്നീട് സിനിമാനടനാക്കിയതും. ജീവിതത്തിലെ എല്ലാ സൗഭാഗ്യങ്ങളും അപ്പുണ്ണി ശശിക്ക് നൽകിയത് കോഴിക്കോട്ടെ നാടകഇടങ്ങളും സൗഹൃദ സദസ്സുകളുമാണ്. അടുത്തിടെ റിലീസ് ചെയ്ത "പുഴു' എന്ന സിനിമയിൽ കുട്ടപ്പൻ എന്ന കഥാപാത്രമായി ഈ കോഴിക്കോട്ടുകാരൻ നടത്തിയ പകർന്നാട്ടം സമാനതകളില്ലാത്തതായിരുന്നു. ജീവിതത്തിന്റെ വഴിത്തിരിവുകളിലെപ്പോഴോ മടിയിലേക്ക് അടർന്നുവീഴുന്ന മധുര നെല്ലിക്കപോലെ മധുരിക്കുന്ന ജീവിതവഴിയിലെ സന്തോഷങ്ങളെ കുറിച്ച് അപ്പുണ്ണി ശശി സംസാരിക്കുന്നു.

വായിക്കാൻ തുടങ്ങുന്നതിന് മുമ്പ് ഒരു ചോദ്യം, നിങ്ങൾ ചക്കരയുടെ കഥ കേട്ടിട്ടുണ്ടോ...? ഒറ്റയ്ക്ക് ജീവിക്കുന്ന 40 കാരിയായ, അവിവാഹിതയായ ചക്കരയുടെ കഥ. ആരാണവർ...? ആരായാലും അവരാണ് അപ്പുണ്ണി ശശിയെ പുഴു എന്ന സിനിമയിലേക്ക് എത്തിച്ചത്. അപ്പോ ആള് ഭയങ്കരിയാ, നമുക്ക് അപ്പുണ്ണി ശശിയോട് തന്നെ ചോദിച്ചു നോക്കാം, ശശിയേട്ടാ ആരാണ് ഈ ചക്കര?

 "ചക്കര നാടകക്കാരുടെ മുത്തല്ലേ, മാതാപിതാക്കൾ ചെറുപ്പത്തിലേ മരിക്കുകയും ഒറ്റക്കണ്ണനായ സഹോദരൻ അവഗണിക്കുകയും ചെയ്യുന്ന ചക്കരയുടെ കഥ നിങ്ങളിനിയും കേട്ടിക്കില്ലേ. ഞാൻ അവതരിപ്പിച്ച ചക്കരപ്പന്തൽ എന്ന നാടകത്തിലെ പ്രധാനകഥാപാത്രമാണ് ചക്കര. ചക്കരപ്പന്തൽ എന്നായിരുന്നു ആ ഏകാംഗ നാടകത്തിന്റെ പേര്. ചക്കര, ഒറ്റക്കണ്ണനായ സഹോദരൻ, മാടമ്പിയായ വെട്ടുകാരൻ കരുണൻ, അയൽവാസിയായ മാളുഅമ്മ എന്നീ കഥാപാത്രങ്ങളെ ഞാൻ ആ നാടകത്തിൽ അവതരിപ്പിച്ചു. ശിവദാസ് പൊയിൽക്കാവാണ് ചക്കരപ്പന്തൽ സംവിധാനം ചെയ്തിരിക്കുന്നത്.