கத்தாரில் இஸ்ரேல் வான்வழித் தாக்குதல்

ஹமாஸ் பேச்சுவார்த்தைக் குழுவினருக்குக் குறி

- 

தோஹா, செப். 9: காஸா போர் நிறுத்தம் தொடர்பாக பேச்சுவார்த்தை நடத்த கத்தார் தலைநகர் தோஹாவுக்கு வந்துள்ள ஹமாஸ் பிரதிநிதிகளைக் குறிவைத்து இஸ்ரேல் ராணுவம் செவ்வாய்க்கிழமை வான்வழித் தாக்குதல் நடத்தியது.

அந்த வகையில், மத்தியக் கிழக்குப் பிராந்தியத்தில் இஸ்ரேலின் தாக்குதலுக்கு உள்ளாகியுள்ள நாடுகளின் பட்டியலில் கத்தாரும் இணைந்துள்ளது. காஸாவில் அமைதியை ஏற்படுத்துவதற்கான சர்வதேச முயற்சிகளில் முக்கிய பங்கு வகித்துவரும் கத்தாரில் இத்தகைய தாக்குதலை இஸ்ரேல் நடத்தியுள்ளது அதிர்வலையை ஏற்படுத்தியுள்ளது.

ஹமாஸ் பேச்சுவார்த்தைக் குழுவினரைக் குறிவைத்து, குறிப்பாக குழு தலைவர் கலீல் அல்-ஹையாவை படுகொலை செய்யும் நோக்கில் இந்தத் தாக்குதல் நடத்தப்பட்டதாகக் கூறப்பட்டாலும், இதில் ஹமாஸ் அமைப்பினர் யாரும் காயமடைந்ததாக தகவல்கள் வெளியாகவில்லை. கலீல் அல்-ஹையாவின் நிலைமை குறித்தும் உறுதியான தகவல் இல்லை.