கடனை வசூலிப்பதில் கடுமை காட்டினால் சிறைத் தண்டனை

மசோதாவை தாக்கல் செய்தார் துணை முதல்வர் உதயநிதி

- 

சென்னை, ஏப். 26: கடன்களை வசூலிப்பதில் மிரட்டுவது போன்ற கடுமைகளைக் காட்டினால் சிறைத் தண்டனை விதிக்க வகை செய்யும் சட்ட மசோதா பேரவையில் தாக்கல் செய்யப்பட்டது.

இது குறித்து விரிவாக விவாதிக்க வேண்டுமென அதிமுக, விசிக ஆகிய கட்சிகள் கோரிக்கை விடுத்தன. இதை பேரவையில் துணை முதல்வர் உதயநிதி ஸ்டாலின் சனிக்கிழமை தாக்கல் செய்தார்.

அதில் கூறப்பட்டுள்ளதாவது: பணக்கடன் வழங்குபவர்கள் மற்றும் அடகுக் கடைகளின் தொழிலை ஒழுங்குமுறைப்படுத்தி, கடும் வட்டியிலிருந்து மக்களைக் காப்பதில் ஒரு முன்னோடி மாநிலமாக தமிழகம் விளங்குகிறது.

தமிழ்நாடு அடகுக் கடைகாரர்கள் சட்டம் 1943, தமிழ்நாடு பணக்கடன் வழங்குபவர்கள் சட்டம் 1957, தமிழ்நாடு கந்து வட்டி தடைச் சட்டம் 2003 ஆகியவற்றை அரசு இயற்றியுள்ளது.

ஆனாலும், பொருளாதாரத்தில் பின்தங்கிய மற்றும் நலிவடைந்த பிரிவினர், குறிப்பாக விவசாயிகள், மகளிர் சுயஉதவிக் குழுக்கள், விவசாய கூலித் தொழிலாளர்கள், பணியாளர்கள், நடைபாதை வியாபாரிகள், பால் பண்ணைத் தொழிலாளர்கள், கட்டடப் பணியாளர்கள், புலம்பெயர்ந்த தொழிலாளர்கள் ஆகியோர் எண்ம முறை (டிஜிட்டல்) உள்பட பல்வேறு வழிகளைப் பின்பற்றும் பணக்கடன் வழங்கும் நிறுவனங்களால் ஈர்க்கப்படுகின்றனர்.

அத்துடன், கவர்ச்சிகரமான கடன்களுக்கு இரையாகி, தாங்க இயலாத கடன் சுமைக்கு உட்படுகின்றனர்.

பணக்கடன் வழங்கும் நிறுவனங்கள், ஏற்கெனவே நிதிச்சுமையிலிருக்கும் கடனாளிகளிடம் இருந்து கடனை வசூலிப்பதற்காக முறையற்ற வழியை நாடுகின்றன.