வரியைக் குறைக்க இந்தியா ஒப்புதல்

அமெரிக்கப் பொருள்கள் மீது விதிக்கப்படும் கூடுதல் வரியைக் குறைக்க இந்தியா ஒப்புக்கொண்டுள்ளது என்று அமெரிக்க அதிபர் டொனால்ட் டிரம்ப் தெரிவித்தார்.

- 

நியூயார்க், வாஷிங்டன், மார்ச் 8:

இந்தியா-அமெரிக்கா இடையேயான வர்த்தக உறவை வலுப்படுத்தும் நோக்கில் மத்திய வர்த்தகத் துறை அமைச்சர் பியூஷ் கோயல் அமெரிக்கா சென்று திரும்பிய நிலையில், இந்தக் கருத்தை அதிபர் டிரம்ப் தெரிவித்தார்.

அமெரிக்க அதிபராக டிரம்ப் இரண்டாவது முறை பதவியேற்ற பின்னர், அந்த நாட்டின் பொருளாதாரத்தை மேம்படுத்தும் நோக்கில் பல்வேறு அதிரடி அறிவிப்புகளை வெளியிட்டு வருகிறார். அமெரிக்கப் பொருள்கள் மீது அதிக வரி விதிக்கும் இந்தியா, சீனா போன்ற நாடுகளின் பொருள்களுக்கு அமெரிக்காவும் பரஸ்பரம் அதே அளவு வரி விதிக்கும் என்று அதிபர் டிரம்ப் தெரிவித்திருந்தார்.

பிரதமர் நரேந்திர மோடி கடந்த மாதம் அமெரிக்கா சென்றிருந்த போது, 'இந்தியா வரி வசூல் மன்னனாகத் திகழ்கிறது' என்று டிரம்ப் விமர்சித்தார்.