பயங்கரவாதத்துக்கு எதிரான போர்: இந்தியாவுக்கு பெருகும் ஆதரவு

பயங்கரவாதத்துக்கு எதிரான போரில் இந்தியாவுக்கு பிரான்ஸ், இத்தாலி, இந்தோனேசியா, சவூதி அரேபியா, கிரீஸ் உள்ளிட்ட மேலும் பல நாடுகள் ஆதரவு தெரிவித்தன.

- 

பாரீஸ், ஜகார்த்தா, பனாமா சிட்டி, மே 28:

இந்த விவகாரத்தில் அனைத்து சர்வதேச அமைப்புகளிலும் இந்தியாவின் நிலைப்பாட்டை ஆதரிப்பதாக அந்நாடுகள் உறுதியளித்துள்ளன.

ஜம்மு-காஷ்மீரின் பஹல்காமில் 26 பேர் கொல்லப்பட்ட பயங்கரவாதத் தாக்குதலுக்கு பதிலடியாக, பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் கடந்த மே 7-ஆம் தேதி இந்திய ராணுவம் ஏவுகணைத் தாக்குதலை நடத்தி (ஆபரேஷன் சிந்தூர்), பயங்கரவாத உள்கட்டமைப்புகளை அழித்தது. பின்னர், இரு நாடுகளுக்கும் இடையே 4 நாட்களுக்கு ராணுவ மோதல் ஏற்பட்டு, பாகிஸ்தானின் கோரிக்கையின்பேரில் சண்டை நிறுத்தப்பட்டது.

ஆபரேஷன் சிந்தூர் வெற்றிக்குப் பிறகு, பாகிஸ்தானின் பயங்கரவாத ஆதரவை உலக நாடுகளிடம் அம்பலப்படுத்தவும், இந்தியாவின் நிலைப்பாட்டை எடுத்துரைக்கவும் ஏழு எம்.பி.க்கள் தலைமையில் அனைத்துக்கட்சிக் குழுக்கள் மத்திய அரசால் அமைக்கப்பட்டன.