அரியலூர், பெரம்பலூரில் காலை உணவுத் திட்டம் விரிவாக்கம்

20 ஆயிரம் மாணவர்கள் பயன்

- 

அரியலூர், பெரம்பலூர், ஆக. 26: முதலமைச்சரின் காலை உணவுத் திட்ட விரிவாக்கத்தின் கீழ் அரியலூர் நகராட்சி தூயமேரி தொடக்கப் பள்ளியில் செவ்வாய்க்கிழமை பள்ளி மாணவர்களுக்கு காலை உணவு வழங்கப்பட்டது.

இந்நிகழ்ச்சியில் கலந்து கொண்ட போக்குவரத்து மற்றும் மின்சாரத் துறை அமைச்சர் சா.சி.சிவசங்கர், மாணவ, மாணவிகளுக்கு காலை உணவினை வழங்கி, முதலமைச்சரின் காலை உணவுத் திட்ட விரிவாக்கத்தை தொடங்கி வைத்து, அவர்களுடன் உணவு சாப்பிட்டார்.

தொடர்ந்து, அவர் பேசுகையில், அரியலூர் மாவட்டத்தில், நகராட்சி மற்றும் பேரூராட்சிகளில் உள்ள அரசு உதவிபெறும் 12 பள்ளிகளில் பயிலும் 2,627 மாணவர்கள் பயன்பெறும் வகையில் முதலமைச்சரின் காலை உணவுத் திட்டம் விரிவாக்கம் செய்யப்பட்டு காலை உணவு வழங்கும் பணிகள் தொடங்கி வைக்கப்பட்டுள்ளது.