பழைய ஓய்வூதியத் திட்டம் வேண்டும்... மீண்டும்!

ராஜஸ்தான், சத்தீஸ்கர், மேற்கு வங்கம், பஞ்சாப், ஹிமாசல பிரதேசம், ஜார்க்கண்ட் ஆகிய மாநிலங்களில் பழைய ஓய்வூதியத் திட்டம் மீண்டும் நடைமுறைக்கு வந்துவிட்டது. ஆக, பல மாநில அரசுகள் பழைய ஓய்வூதியத் திட்டத்தை நடைமுறைப்படுத்தத் தொடங்கிவிட்டன. தமிழகத்தில் அதை அமல்படுத்த ஏன் தயக்கம் என்பது புரியாத புதிராக இருக்கிறது.

- முனைவர் வைகைச்செல்வன்

அரசு ஊழியர்களுக்குப் பழைய ஓய்வூதியத் திட்டத்தையே அமல்படுத்த வேண்டும் என்ற கோரிக்கை பல ஆண்டுகளாக நீடித்து வருகிறது. பழைய ஓய்வூதியத் திட்டம் குறித்து ஆராய்வதற்கு அமைச்சர்கள் அடங்கிய குழு ஒன்றை தமிழக அரசு நியமித்திருக்கிறது. இந்தக் குழு அமைத்தது கருத்துகளை கேட்கிற நோக்கில் காலத்தை நீட்டிக்கிற முயற்சியே தவிர, செயல்படுத்துகிற நோக்கம் அல்ல என்று தமிழ்நாடு அரசு ஊழியர்கள் சங்கம் குற்றஞ்சாட்டுகிறது.

பழைய ஓய்வூதியத் திட்டத்தின்படி, ஓர் ஊழியர் கடைசியாகப் பெற்ற ஊதியத்தில் 50 சதவீதம் ஓய்வூதியமாகத் தரப்படுகிறது. அதில் 40 சதவீத தொகை 12 ஆண்டுகளுக்குக் குறிப்பிட்ட வட்டி விகிதத்துடன் கணக்கிடப்பட்டு, ஊழியர்கள் ஓய்வு பெறும்போது ரொக்கத் தொகையாக வழங்கப்படுகிறது. எனவே, 12 ஆண்டுகளுக்கு மாதந்தோறும் அவர்களுக்கு ரூ.6,000 கிடைக்கும்.

மேலும், ரூ.10,000 என்ற மொத்த ஓய்வூதியத்துக்கான அகவிலைப்படி விலைவாசி உயர்வுக்கு ஏற்ப வழங்கப்படுகிறது. மேலும், 12 ஆண்டுகளுக்குப் பிறகு ரூ.10,000 ஓய்வூதியம் கிடைக்கும். ஒரு வேளை ஓய்வூதியர் இறந்துவிட்டால், அவரது கணவர்/மனைவிக்கு அல்லது அவரும் இறந்துவிட்டால் திருமணமாகாத/கணவரை இழந்த/விவாகரத்து ஆன அவர்களது மகள் அல்லது உடல்நலம் குன்றிய அவர்களது மகனுக்கு ஓய்வூதியம் வழங்கப்படும்.

இந்த நிலையில், தமிழகத்தில் ‘பங்களிப்பு ஓய்வூதியத் திட்டம்’ என்ற பெயரில், 2003-ஆம் ஆண்டு முதல் அமலாகிவருகிறது. இந்தத் திட்டத்தில் ஊழியர் ஓய்வு பெறும்போது ஒரு தொகை வழங்கப்படுகிறது. மாதந்தோறும் ஓய்வூதியம் என்பதே கிடையாது. ஊழியர் பணியில் இருக்கும்போது அவரது ஊதியத்திலிருந்து 10 சதவீதம், அரசுப் பங்களிப்பாக 10 சதவீதம், மேலும் இந்தத் தொகைக்கான வட்டி 7.8 சதவீதம் எனச் சேர்த்து ஓய்வூதியத் தொகையாகச் சேகரிக்கப்படுகிறது. அது அரசுகஜானாவிலும், காப்பீட்டுநிறுவனத்திலும் முதலீடு செய்யப்படுகிறது. ஊழியர் ஓய்வு பெறும்போது இந்தத் தொகை அப்படியே திருப்பி வழங்கப்படுகிறது.