સુરતમાં એક કરોડનું ડ્રગ્સ ફેંકીને ભાગેલા કાસિફને ઉત્તરપ્રદેશ જઈ પોલીસે વેશપલટો કરીને પકડ્યો

મુખ્ય આરોપીનો 1800 કિમી પીછો કરી બારાબંકીથી દબોચ્યો

સુરતના લાલગેટથી 1 કરોડનું એમડી ડ્રગ્સ પકડી પાડવાના કેસમાં મુખ્ય આરોપીનો 1800 કિમી પીછો કરી સુરત પોલીસે પકડી પાડ્યો હતો. એસઓજી(સ્પેશ્યલ ઓપરેશન ગ્રુપ) એ મુસ્લિમ વેશ ધારણ કરીને યુપીના બારાબંકી પાસે એક દરગાહ પર બહાર વોચ ગોઠવી હતી. ત્યારબાદ ડ્રગ્સ માફિયા એવા મુખ્ય સૂત્રધાર મોહંમદ કાસીફ ઈકબાલ ઉર્ફે પસીના શેખને દબોચી લીધો હતો.

સુરત પોલીસના રાઘવેન્દ્ર વત્સનું કહેવું હતું કે, મુંબઇથી 1 કરોડનું ડ્રગ્સ કાસિફે મંગાવ્યું હતું. હજુ તેનો સાગરિત શહેબાઝ ઈર્શાદ હુસૈન ખાન હજુ ફરાર છે. કાસિફ મુંબઈના સાયણ અને નાલાસોપારાથી એમડી માણસો મારફતે મંગાવતો હતો. પોલીસથી બચવા કાસિફ મુંબઇથી યુપી ભાગી ગયો હતો.