வக்ஃப் சொத்தாக அறிவிக்கப்பட்டிருந்தாலும் அரசு நிலத்தின் மீது யாரும் உரிமைகோர முடியாது

உச்சநீதிமன்றத்தில் மத்திய அரசு வாதம்

- 

புது தில்லி, மே 21: அரசு நிலத்தின் மீது யாரும் உரிமை கோர முடியாது. நீண்டகால பயன்பாட்டு அடிப்படையில் வக்ஃப் என அறிவிக்கப்பட்டிருந்தாலும், அரசு நிலமாக இருந்தால் அதை மீட்டெடுப்பதற்கு அரசுக்கு சட்டபூர்வ அதிகாரம் உள்ளது என்று உச்சநீதிமன்றத்தில் மத்திய அரசு சார்பில் புதன்கிழமை வாதிடப்பட்டது.

முறையான பத்திரங்கள் இல்லாவிட்டாலும், மத ரீதியில் அல்லது தொண்டு நோக்கங்களுக்காக நீண்டகால (மரபு வழி) பயன்பாட்டு அடிப்படையில் வக்ஃப் சொத்தாக அங்கீகரிக்க பழைய 1995-ஆம் ஆண்டு வக்ஃப் சட்டம் அனுமதிக்கும் நிலையில், இந்த வாதத்தை மத்திய அரசு முன்வைத்தது.

முஸ்லிம்கள் தானமாகவும், நன்கொடையாகவும் அளிக்கும் நிலங்கள் மற்றும் சொத்துகளை வக்ஃப் வாரியம் நிர்வகித்து வருகிறது. இந்நிலையில், வக்ஃப் சொத்துகளின் நிர்வாகத்தைச் சீரமைக்கும் நோக்கில், 1995-ஆம் ஆண்டின் வக்ஃப் சட்டத்தில் திருத்தங்கள் மேற்கொள்ளும் வகையில் மத்திய அரசு வக்ஃப் திருத்தச் சட்டத்தைக் கொண்டு வந்தது.

இந்தச் சட்டத்தின் அரசமைப்பு செல்லத்தக்கத்தன்மையைக்கேள்வி எழுப்பி 72 மனுக்கள் உச்சநீதிமன்றத்தில் தாக்கல் செய்யப்பட்டன. இவற்றில், 5 மனுக்களைத் தெரிவு செய்த உச்சநீதிமன்றம், மத்திய அரசு கொண்டுவந்த திருத்தச் சட்டத்தில் இடம்பெற்றுள்ள 3 நடைமுறைகளுக்கு இடைக்காலத் தடை விதிப்பது குறித்து விசாரித்து வருகிறது.