குடியரசுத் தலைவருக்குக் கெடு: நியாயப்படுத்த முடியாது

உச்சநீதிமன்றம் கருத்து

- 

புது தில்லி, செப். 2: மசோதாக்களுக்கு ஒப்புதல் அளிக்க சில சந்தர்ப்பங்களில் ஏற்படும் தாமதம் காரணமாக, அவற்றுக்கு ஒப்புதல் வழங்க குடியரசுத் தலைவர், ஆளுநர்களுக்கு காலக்கெடு விதிப்பதை நியாயப்படுத்த முடியாது என்று உச்சநீதிமன்றம் கருத்து தெரிவித்தது.

தமிழக ஆளுநர் ஆர்.என்.ரவி மசோதாக்கள் மீது முடிவு எடுக்காமல் தாமதப்படுத்துவதாக உச்சநீதிமன்றத்தில் தமிழக அரசு வழக்கு தொடுத்தது.

இந்த வழக்கில் தீர்ப்பளித்த உச்சநீதிமன்ற நீதிபதிகள் ஜே.பி.பார்த்திவாலா, ஆர்.மகாதேவன் ஆகியோர் அடங்கிய அமர்வு, 'மசோதாக்கள் மீது ஒரு மாதத்துக்குள் ஆளுநர்கள் முடிவு எடுக்க வேண்டும்; மசோதாக்களை குடியரசுத் தலைவருக்கு அனுப்புவதாக இருந்தால், அதை மூன்று மாதங்களுக்குள் செய்ய வேண்டும்.

குடியரசுத் தலைவரின் பரிசீலனைக்காக மசோதாக்களை ஆளுநர் அனுப்பிவைத்தால், அந்த மசோதாக்கள் குறித்து குடியரசுத் தலைவர் மூன்று மாதங்களுக்குள் முடிவு எடுக்க வேண்டும் என்று காலக்கெடு நிர்ணயித்தது.

இதையடுத்து, சட்டப்பேரவைகளில் நிறைவேற்றப்படும் மசோதாக்களுக்கு ஒப்புதல் அளிப்பதில், நீதிமன்ற உத்தரவுகள் மூலம் குடியரசுத் தலைவருக்குக் காலக்கெடு நிர்ணயிக்க முடியுமா? என்பது உள்பட 14 கேள்விகளை எழுப்பி உச்சநீதிமன்றத்திடம் குடியரசுத் தலைவர் திரௌபதி முர்மு விளக்கம் கேட்டார்.