மருத்துவத் திட்டத்தில் முதல்வர் ஸ்டாலின் பெயர்; தடை விதிக்க உயர்நீதிமன்றம் மறுப்பு

'நலம் காக்கும் ஸ்டாலின்' என்ற மருத்துவத் திட்டத்தில் முதல்வர் ஸ்டாலின் பெயரைப் பயன்படுத்தத் தடை விதிக்க மறுத்த சென்னை உயர்நீதிமன்றம், அரசு விளம்பரங்களை வெளியிடும் போது உச்சநீதிமன்ற வழிகாட்டுதல்களைப் பின்பற்ற உத்தரவிட்டது.

- 

சென்னை, ஜூலை 31: 'நலம் காக்கும் ஸ்டாலின்' என்ற மருத்துவத் திட்டத்தில் முதல்வர் ஸ்டாலின் பெயரைப் பயன்படுத்தத் தடை விதிக்க மறுத்த சென்னை உயர்நீதி மன்றம், அரசு விளம்பரங்களை வெளியிடும் போது உச்சநீதிமன்ற வழிகாட்டுதல்களைப் பின்பற்ற உத்தரவிட்டது.

சென்னை உயர்நீதிமன்றத்தில் அதிமுக மாநிலங்களவை உறுப்பினர் சி.வி.சண்முகம், வழக்குரைஞர் இனியன் ஆகியோர் தாக்கல் செய்த பொதுநல மனு: தமிழக அரசு வெளியிட்டுள்ள 'உங்களுடன் ஸ்டாலின்' திட்ட விளம்பரத்தில் அரசு முத்திரை இடம்பெற்றுள்ளது. அதில் முன்னாள் முதல்வர் கருணாநிதி மற்றும் தற்போதைய முதல்வர் மு.க.ஸ்டாலின் ஆகியோரது படங்களும் இடம் பெற்றுள்ளன. இது உச்சநீதிமன்ற தீர்ப்புக்கு முரணானது. தனிமனித சாதனையைப் போல அரசு திட்டத்தை விளம்பரப்படுத்துவது தவறானது.

அரசியல் காரணங்களுக்காக அரசு நிதி கோடிக்கணக்கில் செலவு செய்யப்படுகிறது. இந்த திட்டம் முற்றிலும் அரசியல் நோக்கம் கொண்டது. 'உங்களுடன் ஸ்டாலின்' திட்ட விளம்பரத்தில் கூறப்பட்டுள்ள தகவலுக்கும் முன்னாள் முதல்வர் கருணாநிதியின் படத்துக்கும் எந்தத் தொடர்பும் இல்லை. எனவே, கருணாநிதியின் புகைப்படத்தை பயன்படுத்துவது வழிமுறைகளுக்கு எதிரானது.