அரையிறுதியில் சபலென்கா, அல்கராஸ்

கிராண்ட்ஸ்லாம் டென்னிஸ் போட்டியான விம்பிள்டனில், முன்னணி போட்டியாளர்களான பெலாரஸின் அரினா சபலென்கா, ஸ்பெயினின் கார்லோஸ் அல்கராஸ் ஆகியோர் அரையிறுதிக்கு முன்னேற்றினர்.

- 

லண்டன், ஜூலை 9:

மகளிர் ஒற்றையர் காலிறுதியில், உலகின் நம்பர் 1 வீராங்கனையான சபலென்கா 4-6, 6-2, 6-4 என்ற செட்களில் ஜெர்மனியின் லாரா சிக்மண்டை தோற்கடித்தார். 2 மணி நேரம், 54 நிமிடங்கள் நீடித்த இந்த ஆட்டம், நடப்பு சீசனில் 3-ஆவது மிக நீண்ட ஆட்டமாக அமைந்தது.

இந்த வெற்றியின் மூலமாக சபலென்கா, விம்பிள்டனில் 3-ஆவது முறையாக அரையிறுதிக்கட்டத்துக்கு வந்துள்ளார். அத்துடன், ஆண்டின் இறுதியில் ரியாதில் நடைபெறவுள்ள டபிள் யூடிஏ ஃபைனல்ஸ் போட்டிக்கும் முதல் வீராங்கனையாக அவர் தகுதி பெற்றிருக்கிறார்.

கடந்த 2022 யுஎஸ் ஓபனுக்குப் பிறகு 11 முறை கிராண்ட்ஸ்லாம் போட்டிகளில் களம் கண்டிருக்கும் சபலென்கா, அதில் 10-ஆவது முறையாக அரையிறுதிக்கு வந்துள்ளது குறிப்பிடத்தக்கது. ஒரே விதிவிலக்காக, 2024 பிரெஞ்சு ஓபன் காலிறுதியில் ரஷியாவின் மிரா ஆண்ட்ரீவாவிடம் அவர் தோற்றிருக்கிறார்.