பயணங்கள் தரும் பாடம்

திட்டமிட்ட பயணம்தான் என்றாலும் முன்கூட்டிக் கிளம்பாமல், கடைசி நேரம் வரை பொறுத்திருந்து பரபரத்துக் கிளம்புபவர்களால்தான் பயண நெருக்கடிகள் மிகுதி. சில மணித்துளிகளில் இழக்கும் நிதானம் பலகால இயல்பு வாழ்வைப் பாதிக்கும் என்பது தெரிந்தும் முந்தி விரைவது நவீன மூடத்தனம்.

- கிருங்கை சேதுபதி

எதற்கும் அவசரம்; எங்கும் பரபரப்பு; முண்டியடித்துக்கொண்டு முன்னேறும் வேகத்தில் உண்டாகும் நெரிசல். இவைகள் கூடிய படுத்துப் பாத்தால் கவலையாக இருக்கிறது. கரோனா காலத்தில் ஊரடங்கு அமலில் இருந்த போது, இவற்றின் சுவடுகள் ஏதுமின்றி, இயற்கையில் ஒன்றியவர்களாய் வெகுநிதானமாய் இருந்தவர்கள் நாம்தானா என்கிற ஐயப்பாடு எழுகிறது.

அப்போதைய தேவைக்கு வாங்கிய வாகனங்களே இப்போதைய நெரிசலுக்கும் பரபரப்பிற்கும் முக்கிய காரணம்' என்கிறார்கள். பயணிகளின் எண்ணிக்கைக்கு நிகராக வாகனங்களின் எண்ணிக்கையும் மிகுந்திருக்கிறது. குறித்த நேரத்தில் இலக்கினை அடைந்துவிட்ட பிறகும் கூட, வந்த வாகனத்தை நிறுத்தத் திட இடம் தேடுவது சிக்கலாகி விடுகிறது. நிறுத்த இடம் இன்றிக்கட்டிய இல்லங்களின் வாசல்களில் நிற்கும் வாகனங்களில் மோதாமல் தன் வாகனத்தைச் செலுத்திப் பாதையைக் கடக்கத் தெரிந்தவர்கள் பாக்கியவான்கள். தீர்மானம் இல்லாத திடீர் பயணங்கள் தவிர்க்க முடியாதவை; அதற்காகத் தேவையில்லாத விரைவு நிச்சயம் தவிர்க்க வேண்டியது.

திட்டமிட்ட பயணம்தான் என்றாலும் முன்கூட்டிக் கிளம்பாமல், கடைசி நேரம் வரை பொறுத்திருந்து பரபரத்துக் கிளம்புபவர்களால்தான் பயண நெருக்கடிகள் மிகுதி. சில மணித்துளிகளில் இழக்கும் நிதானம் பலகால இயல்பு வாழ்வைப் பாதிக்கும் என்பது தெரிந்தும் முந்தி விரைவது நவீன மூடத்தனம்.

இருசக்கர வாகனங்களில் செல்பவர்கள் திடீரென்று வேகத்தைக் கூட்டுவதும், படக்கென்று பிரேக் அடித்து நிறுத்துவதும், பரபரத்து முன்னேறுவதும் பின் வரும் பெருவாகனங்களை நிலைதடுமாறச் செய்வதோடு விபத்துகளையும் உண்டாக்குகின்றன. சில மணித்துளிகளில் முந்திச் செல்ல விரைந்து மோதிப் பிறகு, பல மணிநேரம் சண்டையிடுகிற மனிதர்களை எதில் சேர்ப்பது? சாலை, அனைவருக்கும் பொது; பாதுகாப்பான பயணம் அதைவிடவும் பொது அல்லவா?

முன்னால் எந்த வண்டி போகும்? எனக் கேட்போர்க்கு, எல்லா வண்டியும் முன்னாலதான் போகும் என்று பதில் சொல்லுகிற ஓட்டுநரின் குரலில் மெல்லிய நகைச்சுவை இழையோடி, அவரது இயந்திரத்தன்மையைப் போக்கும். எரிச்சலை வெளிக்காட்ட முடியாமல், சிரித்தபடி பேருந்து கிளம்பும் நேரத்தைக் கேட்பவர்களின் முகம் பரிதாபமாய்த் தெரியும். அவர்களுக்கு என்ன அவசரமோ?