பஹல்காம் பயங்கரவாதத் தாக்குதலுக்கு முன்பாக எச்சரித்த உளவுத்துறை

'ஸ்ரீநகரில் சுற்றுலாப் பயணிகள் குறிவைக்கப்படலாம்'

- 

ஜம்மு-காஷ்மீரின் ஸ்ரீநகர் அருகே ஜாபர்வன் மலையடிவாரத்தில் உள்ள தங்கும் விடுதிகளில் சுற்றுலாப் பயணிகளைக் குறிவைத்து பயங்கரவாதிகள் தாக்குதல் நடத்தக் கூடும் என்று பஹல்காம் தாக்குதலுக்கு முன்பாக உளவுத்துறை எச்சரித்ததாக அதிகாரிகள் சனிக்கிழமை தெரிவித்தனர்.

உளவுத்துறை எச்சரிக்கையின்படி, ஸ்ரீநகரையொட்டிய பகுதிகளில் பாதுகாப்புப் படையினர் தீவிர சோதனை மேற்கொண்டதாகவும், சந்தேகத்துக்கிடமாக யாரும் சிக்காததால், கடந்த ஏப்ரல் 22-ஆம் தேதி சோதனை நிறுத்தப்பட்டதாகவும் அதிகாரிகள் தெரிவித்தனர்.

இதே நாளில்தான், ஸ்ரீநகரில் இருந்து 90 கி.மீ. தொலைவில் உள்ள பஹல்காமில் சுற்றுலாப் பயணிகள் மீது பயங்கரவாதத் தாக்குதல் நடந்தது. 'சிறிய ஸ்விட்சர்லாந்து' எனப் பெயர்பெற்ற பைசாரன் பள்ளத்தாக்கில் 26 பேரை சுட்டுக் கொன்றுவிட்டு பயங்கரவாதிகள் தப்பினர்.