உன் பாவத்தில் எனக்குப் பங்கில்லை!

ஆளுகிற கட்சிக்கு ஆயிரம் காரணம் இருக்கும். கார்ப்பரேட் நலன்களைக் காப்பதற்காக காவல் அதிகாரிகள் செய்த செயல், "தேசபக்தச்" செயல் என்றுகூட ஆட்சியாளர் நினைக்கலாம். கூட்டணிக் கட்சிகள் தனிக் கொள்கை உடைய தனித்த கட்சிகள்தாமே? ஆளுங்கட்சி பாவங்களில் பங்கு பெறவேண்டிய கட்டாயம் என்ன?

- பழ. கருப்பையா

மக்கள் தொகைக்கு ஏற்பப் பாராளுமன்ற இடங்கள் என்றால், மக்கள் தொகையைக் கட்டுப்படுத்திய தென்மாநிலங்கள் பெருமளவுக்கு ஒடுங்கிவிடும்.

இதனால் ஒரு கன்று போடும் தாயனைய பசுவினும், பல குட்டிகளை ஈனும் பன்றிகளின் கை ஓங்கிவிடும்.

இதற்காக பாதிக்கப்படவிருக்கும் மாநிலங்களின் முதலமைச்சர்கள் கூட்டத்தை நடத்த முயல்கிறார் நம்முடைய முதலமைச்சர்.

ஒரு புகழ்மிக்க நாளிதழின் ஆசிரியர் உரையாடும்போது என்னிடம் சொன்னார்: "இப்போதுள்ள பாராளுமன்ற உறுப்பினர்களின் மொத்த எண்ணிக்கையில் ஒவ்வொரு மாநிலத்தின் பங்கு இதுவரை எத்தனை விழுக்காடோ, அத்தனை விழுக்காடே தொடரும் என்று முடிவு செய்துவிட்டால், இந்தச் சிக்கல் எளிதாகத் தீர்ந்துவிடுமே" என்றார்.

சிக்கலுக்குத் தீர்வு என்று எதையும் சொல்லாமல், இந்தச் சிக்கலை இன்னும் ஒரு முப்பதாண்டுகளுக்குத் தள்ளிப்போட வேண்டும் என்கிறார் தமிழ்நாடு முதலமைச்சர்.

ஆந்திராவும் இதுபோல் பாதிக்கப்படும் மாநிலம் என்பதால், அதன் முதல்வர் சந்திர பாபு நாயுடு கொடுக்கின்ற முட்டுத்தான் இன்றைய மைய அரசைச் சாய்ந்துவிடாமல் நிறுத்தி வைத்திருக்கிறது என்பதால், இதைத் தடுப்பதில் அவருடைய பங்கு முதன்மை வாய்ந்ததாக இருக்கும்.

சத்தம் போடுவது நாமாக இருந்தாலும் சாதிக்க முடிந்தவர் சந்திரபாபு நாயுடுதான்!

நம்முடைய அரசியல் சாசனம் காலத் தால் எத்தனையோ மாறுதல்களை எதிர் நோக்கி இருக்கிறது.

பாக்கித்தான் பிரிவினையால் ஏற்பட்ட இரத்தச் சிந்தல்களையும், மனிதப் பேரழிவையும் கண்முன்னால் நிறுத்திக்கொண்டு எழுதப்பட்ட, விவாதிக்கப்பட்ட அரசியல் சாசனம் நம்முடையது.

அதன் விளைவுதான், மெலிவான மாநில அரசுகளும், வலிவான மைய அரசும்.

இன்றைய குடியாட்சிச் சீர்கேடுகளுக்குச் சாசனத்தின் போதாமையே காரணம்.

இன்றையத் தேர்தல் முறையும் இதற்கு ஒரு பெருங்காரணம்.

விகிதாசார வாக்களிப்பு முறை இருந்தால், சிறிய கட்சிகளும் வாழும். சிறிய அளவில் வாக்குகளைப் பெறுகின்ற கட்சிகளும் சட்டமன்றத்தில், அவர்களின் வலிவுக்கு ஏற்ற இடத்தினைப் பெற முடியும். இலங்கை போன்ற நாடுகளில் சாசன மாற்றங்கள் நிகழும்போது, இந்தியாவில் நிகழ முடியாததற்குக் காரணம் தன்னல அக்கறைச் சக்திகளே (வெஸ்ட்டடு இன்டெரஸ்ட்ஸ்).