மீனவர் பிரச்னைக்கு பேச்சு மூலம் தீர்வு

புது தில்லி, டிச.16: மீனவர்கள் பிரச்னைகளுக்கு பேச்சுவார்த்தை மற்றும் ஆக்கபூர்வமான நடவடிக்கைகள் மூலம் தீர்வை எட்ட முடியும் என்று பிரதமர் மோடியும், இலங்கை அதிபர் அநுரகுமாரவும் திங்கள்கிழமை நம்பிக்கை தெரிவித்தனர்.

- 

மூன்று நாள் அரசு முறை பயணமாக இந்தியா வந்துள்ள இலங்கை அதிபர் அநுரகுமார திசாநாயக, தில்லியில் பிரதமர் மோடியை திங்கள்கிழமை சந்தித்துப் பேசினார்.

இந்த சந்திப்பை தொடர்ந்து இரு நாடுகளும் வெளியிட்ட கூட்டறிக்கையில் தெரிவிக்கப்பட்டது:

பிரதமர் மோடி, அதிபர் அநுரகுமார இடையிலான சந்திப்பில் ஆழமான கலாசார மற்றும் நாகரிக பிணைப்பு, புவியியல் நெருக்கம், இரு நாட்டு மக்கள் உறவு ஆகியவற்றால் இந்தியா-இலங்கை உறவு கட்டமைக்கப்பட்டுள்ளது என்று இரு தலைவர்களும் தெரிவித்தனர்.

கடந்த 2022-ஆம் ஆண்டு இலங்கையில் கடுமையான பொருளாதார நெருக்கடி ஏற்பட்டபோது இலங்கைக்கு இந்தியா ஆதரவு அளித்ததற்கு பிரதமர் மோடியிடம் அதிபர் அநுரகுமார நன்றி தெரிவித்தார்.

இலங்கையின் வளமான எதிர்காலம், மிகப் பெரிய வாய்ப்புகள் மற்றும் நீடித்த பொருளாதார வளர்ச்சிக்கு இந்தியா தொடர்ந்து துணை நிற்கும் என்று அதிபர் அநுரகுமாரவிடம் பிரதமர் மோடி உறுதியளித்தார்.

மலையகத் தமிழர்களுக்கான திட்டங்களுக்கு ஆதரவு: இலங்கையில் மலையகத் தமிழர்கள், கிழக்கு மாகாணத்துக்கான திட்டங்களை உரிய காலத்தில் நிறைவு செய்வதற்கு இந்தியா முழு ஆதரவு அளிக்கும் என்றும் மாகாணத் தேர்தல்களை நடத்தி இலங்கைத் தமிழர்களுக்கு அளித்த வாக்குறுதிகளை நிறைவேற்ற வேண்டும் என்றும் பிரதமர் மோடி வலியுறுத்தினார்.