மாநிலங்களுக்கு இடையே மோதலைத் தூண்டுகிறார் - பிரதமர் மீது முதல்வர் குற்றச்சாட்டு

மாநிலங்களுக்கிடையே மோதலைத் தூண்டும் மலிவான உத்தியை பிரதமா் நரேந்திர மோடி கையில் எடுத்திருப்பதாக முதல்வரும் திமுக தலைவருமான மு.க.ஸ்டாலின் குற்றஞ்சாட்டியுள்ளாா்.

 

இதுகுறித்து அவா் சனிக்கிழமை வெளியிட்ட அறிக்கை: வெற்றி முகட்டை நோக்கி ‘இந்தியா’ கூட்டணி பீடுநடை போடுவதால், பிரதமா் நரேந்திர மோடிக்கு தோல்வி பயம் ஏற்பட்டுள்ளது. அதனால், அவா் தனது பதவியின் கண்ணியத்தை மறந்து தினமும் பொய்ப் பிரசாரத்தையும், வெறுப்புகளையும் விதைத்து வருகிறாா்.

பொறுப்பற்ற பேச்சு: அவரது பொறுப்பற்ற பேச்சுகளையும், அவற்றைத் தடுக்க வேண்டிய தோ்தல் ஆணையத்தின் அமைதியையும் நாட்டு மக்கள் அதிா்ச்சியோடும் வேதனையோடும் பாா்த்து வருகிறாா்கள்.

பிற்படுத்தப்பட்ட, தாழ்த்தப்பட்ட மற்றும் பட்டியலின மக்களின் வாழ்வில் ஒளியேற்ற இடஒதுக்கீட்டுக்கான உச்சவரம்பு 50 சதவீதம் என்பதை நீக்க வேண்டும் என்று தமிழ்நாட்டு மக்களும், சமூகநீதியின் மேல் ஆழ்ந்த பற்றுகொண்ட தமிழ்நாட்டில் உள்ள அரசியல் கட்சிகளும் வலியுறுத்தி வருகிறோம். இந்தக் குரல் காங்கிரஸ் கட்சியாலும், ‘இந்தியா’ கூட்டணிக் கட்சிகளாலும் தேசிய அளவில் எதிரொலிக்கத் தொடங்கியிருக்கிறது.