2023 ചെറുധാന്യങ്ങളുടെ വർഷം

2023 ചെറുധാന്യങ്ങളുടെ വർഷമായി ആചരിക്കാൻ ഐക്യരാഷ്ട്രസഭയുടെ കീഴിലുള്ള ഫുഡ് ആൻഡ് അഗ്രിക്കൾച്ചർ ഓർഗനൈസേഷൻ തീരുമാനിച്ചിരിക്കുകയാണ്. ഭക്ഷ്യസുരക്ഷയിലും പോഷകാഹാരത്തിലും ചെറുധാന്യങ്ങളുടെ പങ്കിനെക്കുറിച്ച് സമൂഹത്തിൽ അവബോധമുണ്ടാക്കുക എന്നതാണ് ഇതിന്റെ ലക്ഷ്യം.

- അക്ഷര അർജുൻ

ഭക്ഷ്യാവശ്യങ്ങൾക്കായി കൃഷി ചെയ്യുന്നവയിൽ പ്രധാനമാണ് ധാന്യങ്ങളും (സീറിയൽ) ചെറുധാന്യങ്ങളും (മില്ലെറ്റ്). നെല്ല്, ഗോതമ്പ്, ചോളം, ഓട്സ്, ബാർലി തുടങ്ങിയവയാണ് ധാന്യങ്ങൾ. ജോവർ, ബജ്റ, റാഗി (മുത്താറി), കമ്പം, തിന, കൂവരക്, ചാമ, വരക്, കവടപ്പുല്ല് എന്നിവ ചെറുധാന്യങ്ങളിൽപ്പെടുന്നു.

പുല്ലുവർഗത്തിൽപ്പെട്ട ധാന്യവിളയാണ് ചെറുധാന്യങ്ങൾ. മില്ലറ്റുകൾ ഏഷ്യയിലും ആഫ്രിക്കയിലുമാണ് പ്രധാനമായും കൃഷി ചെയ്യുന്നത്. ഇന്ത്യ, മാലി, നൈജീരിയ, നൈജർ എന്നീ രാജ്യങ്ങളിലാണ് ഇവയുടെ ഉത്പാദനം കൂടുതൽ നടക്കുന്നത്. വരൾച്ചയെയും ഉയർന്ന താപനിലയെയും അതിജീവിച്ച് മികച്ച വിളവ് നൽകാൻ ഇവയ്ക്ക് കഴിയും.

ചെറുധാന്യങ്ങൾ ഉപഭോക്താവിനും കൃഷിക്കാരനും നല്ലതാണ്. കാലാവസ്ഥയ്ക്കും കാർഷിക ഭക്ഷണവൈവിധ്യം വർധിപ്പിക്കുന്നതിനുള്ള നല്ലൊരു മാർഗമാണിവ. അരി, ഗോതമ്പ് എന്നിവയിൽ മാത്രമൂന്നിയുള്ള കൃഷിരീതിയും ഭക്ഷണരീതിയും ആരോഗ്യപരമായും പാരിസ്ഥിതികപരമായും സാമ്പത്തികപരമായും ഒട്ടേറെ പ്രശ്നങ്ങൾ സൃഷ്ടിക്കുന്നുണ്ട്. ഇതിനുള്ള ബദൽ മാർഗമെന്ന നിലയ്ക്കാണ് ചെറുധാന്യങ്ങൾ ശ്രദ്ധ നേടുന്നത്.

ഐക്യരാഷ്ട്രസഭയുടെ കീഴിലുള്ള ഫുഡ് ആൻഡ് അഗ്രിക്കൾച്ചർ ഓർഗനൈസേഷൻ (എഫ്.എ.ഒ.) ചെറുധാന്യങ്ങളുടെ വർഷമായി 2023നെ തിരഞ്ഞെടുത്തിട്ടുണ്ട്. ഭക്ഷ്യസുരക്ഷയിലും പോഷകാഹാരത്തിലും ചെറുധാന്യങ്ങളെക്കുറിച്ചുള്ള അവബോധം വർധിപ്പിക്കുക എന്നതാണ് ഇതിന്റെ ലക്ഷ്യം. ചെറുധാന്യങ്ങളുടെ ഉത്പാദനം മെച്ചപ്പെടുത്താനും ആഗോള ആഭ്യന്തരവിപണികളിലെ ആവശ്യകത ഉയർത്തുന്നതിനും വേണ്ടി ഇന്ത്യാ സർക്കാരാണ് ചെറുധാന്യങ്ങളുടെ വർഷമായി 2023-നെ ഉയർത്തിക്കാട്ടണമെന്ന് ഐക്യരാഷ്ട്രസഭയിൽ ആവശ്യപ്പെട്ടത്. ഇതിനെ 72 രാജ്യങ്ങൾ പിന്തുണയ്ക്കുകയും തുടർന്ന് 2021 മാർച്ചിൽ ഐക്യരാഷ്ട്ര സമിതിയുടെ പൊതുസഭ ഇത് അംഗീകരിച്ചത്. ചെറുധാന്യങ്ങളുടെ ആഗോളശ്രദ്ധയാണ് ഇന്ത്യ ഇതിലൂടെ ലക്ഷ്യം വയ്ക്കുന്നത്.

ചെറുധാന്യങ്ങൾക്ക് വിപണിയിൽ പ്രിയവും മികച്ച വിലയുമുണ്ടായാൽ ഇവ കൃഷി ചെയ്യാനും ആളുകൾ തയ്യാറാകും. നമ്മുടെ ഭക്ഷണക്രമത്തിൽ ഒരു നേരമെങ്കിലും ചെറുധാന്യങ്ങൾ ഉൾപ്പെടുത്തണം എന്ന സന്ദേശവും കൂടിയാണ് ഇത് മുന്നോട്ടുവയ്ക്കുന്നത്. ഇതിന്റെ മുന്നോടിയായി ഇന്ത്യയിലെ കാർഷിക മന്ത്രാലയം വിവിധ പരിപാടികൾ സംഘടിപ്പിക്കുന്നുണ്ട്.

സൂപ്പർ ഭക്ഷണം