G 20 ഇന്ത്യ നയിക്കുമ്പോൾ...

ലോകത്തെ വലിയ സാമ്പത്തികശക്തികളുടെ കൂട്ടായ്മയായ ജി20-യുടെ അധ്യക്ഷസ്ഥാനം ഇപ്പോൾ ഇന്ത്യക്കാണ്. ഒരുവർഷമാണ് ഇതിന്റെ കാലാവധി. നിലവിലെ സാമ്പത്തികമാന്ദ്യമടക്കമുള്ള പ്രശ്നങ്ങൾ ഇന്ത്യയുടെ നേതൃമികവിനെ പരീക്ഷിക്കും

- എസ്. രാംകുമാർ

ലോകത്തെ ഏറ്റവും പ്രധാനപ്പെട്ട 20 ലോക സമ്പദ്വ്യവസ്ഥകളുടെ സാരഥ്യം നവംബറിൽ ഇൻഡൊനീഷ്യയിലെ ബാലിയിൽ നടന്ന ജി20 (ഗ്ലോബൽ 20) ഉച്ചകോടിയിൽ ഇന്ത്യ ഏറ്റെടുത്തിരിക്കുകയാണ്. ഡിസംബർ ഒന്നിന് ഔദ്യോഗികമായി അധ്യക്ഷപദവിയിലേറി.

ഉച്ചകോടിയുടെ സമാപനയോഗത്തിൽ ഇൻഡൊനീഷ്യൻ പ്രസിഡന്റ് ജോക്കോ വിഡോഡോ അടുത്ത ഒരുവർഷത്തെ അധ്യക്ഷസ്ഥാനത്തിന്റെ പ്രതീകമായി ചുറ്റിക മോദിക്ക് കൈമാറി. ഡിസംബർ ഒന്നു മുതൽ 2023 നവംബർ 30 വരെയാണ് ഇന്ത്യയുടെ നേതൃകാലം. 2023 സെപ്റ്റംബർ 19, 20 തീയതികളിൽ ന്യൂഡൽഹിയിലാണ് കൂട്ടായ്മ വീണ്ടും സമ്മേളിക്കുക. 

എന്താണ് ജി20?

1999-ൽ ധനകാര്യമന്ത്രിമാരുടെയും കേന്ദ്ര ബാങ്ക് ഗവർണർമാരുടെയും സമ്മേളനമായാണ് ഇത് ആരംഭിച്ചത്. പിന്നീട് ഉന്നതതല സാമ്പത്തിക, നയതന്ത്ര ഉച്ചകോടിയായി പരിണമിച്ചു. ലോകത്തെ മൊത്ത ആഭ്യന്തരോത്പാദനത്തിന്റെ 80 ശതമാനവും അന്താരാഷ്ട്രവ്യാപാരത്തിന്റെ 75 ശതമാനവും ലോകജനസംഖ്യയുടെ 60 ശതമാനവും ജി20 രാഷ്ട്രങ്ങളുടെതാണ്.

അർജന്റീന, ഓസ്ട്രേലിയ, ബ്രസീൽ, കാനഡ, ചൈന, ഫ്രാൻസ്, ജർമനി, ഇന്ത്യ, ഇൻഡൊനീഷ്യ, ഇറ്റലി, ജപ്പാൻ, ദക്ഷിണകൊറിയ, മെക്സിക്കോ, റഷ്യ, സൗദി അറേബ്യ, ദക്ഷിണാഫ്രിക്ക, യു.കെ., യു.എസ്. എന്നീ രാജ്യങ്ങളും യൂറോപ്യൻ യൂണിയനുമാണ് ജി20-യിലെ അംഗങ്ങൾ.