കര,നാവികസേനകളിൽ സൗജന്യ പ്രൊഫഷണൽ വിദ്യാഭ്യാസം

ശാസ്ത്ര വിഷയങ്ങളിൽ സമർഥരായ പ്ലസ് ടു വിദ്യാർഥികൾക്ക് നിരവധി അവസരങ്ങളാണ് ഇന്ത്യൻ കര, നാവിക സേനകൾ ഒരുക്കിയിട്ടുള്ളത്

- ♥ ഗോപകുമാർ കാരക്കോണം

സേവനസന്നദ്ധരായ യുവതീയുവാക്കൾക്ക് കര, നാവികസേനകളിൽ സൗജന്യ പ്രൊഫഷണൽ വിദ്യാഭ്യാസത്തിനും ഓഫീസറായി ജോലി നേടാനും അവസരമുണ്ട്. ശാസ്ത്രവിഷയങ്ങളിൽ സമർഥരായ  വിദ്യാർഥികൾ പരിമിതമായ ഇത്തരം അവസരങ്ങൾ പ്രയോജനപ്പെടുത്തുന്നതിന് പ്രത്യേകം ശ്രദ്ധിക്കേണ്ടതാണ്.

കരസേനയിൽ ടെക്നിക്കൽ എൻട്രി

സൗജന്യ എൻജിനീയറിങ് പഠനത്തിനും ലഫ്റ്റനന്റ് പദവിയിൽ ഓഫീസറായി ജോലി ലഭിക്കാനും കരസേനയുടെ 10+2 ടെക്നിക്കൽ എൻട്രി പദ്ധതിയിൽ ചേരാവുന്നതാണ്. അവിവാഹിതരായ ആൺകുട്ടികൾക്കാണ് അവസരം. വർഷംതോറും 90 പേർക്കാണ് പ്രവേശനം. വിജ്ഞാപനം കരസേനയുടെ ഔദ്യോഗിക വെബ്സൈറ്റായ www.joinindianarmy.nic.inൽ യഥാസമയം പ്രസിദ്ധപ്പെടുത്തും. ഓൺലൈനായി അപേക്ഷ സമർപ്പിക്കാം.

പ്രായം: പതിനാറരയ്ക്കും പത്തൊൻപതരയും മധ്യേ.

യോഗ്യത: പ്ലസ് ടു /തത്തുല്യ ബോർഡ് പരീക്ഷയിൽ ഫിസിക്സ്, കെമിസ്ട്രി, മാത്തമറ്റിക്സ് വിഷയങ്ങൾക്ക് മൊത്തം 70 ശതമാനം മാർക്കിൽ കുറയാതെ വിജയിച്ചിരിക്കണം. മെഡിക്കൽ, ഫിസിക്കൽ ഫിറ്റ്നസ് ഉണ്ടാകണം. 157.5 സെന്റിമീറ്ററിൽ കുറയാതെ ഉയരവും അതിനനുസൃതമായ ഭാരവും വേണം. വൈകല്യങ്ങളൊന്നും പാടില്ല.