ટ્રમ્પના ટેરિફ વૉર સામે આ હશે ભારતનો જવાબ?

નરેન્દ્ર મોદી-વ્લાદિમીર પુતિનઃ અમેરિકા સામે નવી રણનીતિ

- 

અમેરિકી પ્રમુખ ડોનાલ્ડ ટ્રમ્પનું ગણિત કાચું છે અથવા તો એમને યાદશક્તિની સમસ્યા છે. કાં પછી ભારતે એમના નામની નોબેલ શાંતિ પારિતોષિક માટે ભલામણ ન કરી એનો ગુસ્સો એમણે દાઢમાં રાખ્યો છે. આત્મશ્લાઘા કરવામાં એમને કોઈ પહોંચે એમ નથી. છાશવારે પોતે કેટલાં યુદ્ધ અટકાવ્યાં અને કેટલા માણસોના જાન જતા રોક્યા એનું રટણ કરતાં એ થાકતા નથી. ભારત-પાક વચ્ચેના ટૂંકા યુદ્ધમાં (ઑપરેશન સિંદૂર દરમિયાન) કેટલાં વિમાન તૂટી પડ્યાં એના આંકડા પણ ટ્રમ્પ વધારતા જાય છે. જો કે ટ્રમ્પ જે આંકડા ફેંકે છે એમાં વધુ તો અમેરિકી બનાવટનાં (પાકિસ્તાન પાસેનાં) એફ-૧૬ પ્લેન જ હોવાની શક્યતા છે. અલબત્ત, અત્યારે ભારતની પાછળ આદું ખાઈને પડેલા ટ્રમ્પ એ વિશે સ્પષ્ટતા કરતા નથી.