બીજાને જજ કરવા કરતાં જાતને મૂલવવી એટલે સ્વયંનું સ્વચ્છતા અભિયાન...

તંદુરસ્ત હો તો ક્યારેક રક્તદાન કરી દેવું એ કૃષ્ણ જેને કર્મ એ કહે એવું કામ છે. પોતે ફેક્યો ન હોય એવો કચરો ઉપાડીને કચરાટોપલીમાં નાખી દેવો એ પણ ગીતાકારને ગમે એવું કામ છે.

- મિલી મેર

થોડા સમય પહેલાં સોશિયલ મીડિયામાં એક સરસ વાત વાંચી હતી. જેમાં એ વ્યક્તિએ લખેલું કે, ‘એક જગ્યાએ મેં એક ગાર્ડનમાં મસ્ત દશ્ય જોયેલું. સાંજે એક વ્યક્તિ ગાર્ડનમાં કસરત કરવા આવી હતી. ગાર્ડનના એક હિસ્સામાં એ પુશઅપ, સ્ક્વૉટ્સ જેવી જાતભાતની કસરત કરે અને કસરતના દરેક સેટ વચ્ચે એટલામાં એકાદ મિનિટ જેવું વૉક કરે...પણ એ વૉક કરે ત્યારે ગાર્ડનમાં જે કંઈ પણ વેફરના પેકેટ કે પાણીની બોટલ વગેરે કચરો પડ્યો હોય એ ઉપાડીને ડસ્ટબિનમાં નાખતાં જાય. એ એક્સરસાઇઝ કરે એની દસેક મિનિટમાં તો ગાર્ડનનો એટલો હિસ્સો એકદમ ચોખ્ખો ચણાક થઈ જાય.' આજે આ વાતને વિચારું તો એમ થાય કે એ વ્યક્તિ જે એક્સરસાઇઝ કરતી હતી એ તો એક ક્રિયા થઈ, પણ એનું કચરો ઉપાડી ડસ્ટબિનમાં નાખતું જવું એ કર્મ છે.