પદ્મભૂષણથી સન્માનિતડોક્ટરની જીવનમાં ઉતારવા જેવી વાત...

આપણે સંતાનો માટે રૂપિયા-સંપત્તિ ભેગી કરીને વારસામાં આપવામાં મહેનત કરતાં રહીએ છીએ, પણ આપણું શરીર સાચવીને એ દ્વારા બાળકને તંદુરસ્ત વારસો કે બાળકના જન્મ પછી એને સ્વસ્થ જીવનશૈલી આપવા બાબતે ખાસ કશી મહેનત કરતાં નથી.

- મિલી મેર

એમબીબીએસ ભણતા એક યુવાનના ફાઇનલ યરનું સૌથી અઘરું ગણાતું એવું ‘મેડિસિન’નું પેપર છે, યુવાન એ દિવસે વહેલી સવારથી રિવિઝનમાં લાગ્યો છે. પેપરના સમયને કલાક જેટલી વાર છે ત્યારે એ નહાવા ઊભો થાય છે. બરાબર એ જ સમયે એના પિતા આવીને પૂછે છે, ‘તારી આજની વર્જિશ (કસરત) થઈ ગઈ?’ યુવાન જવાબ આપે છે કે, ‘ના...આજે મેડિસિનનું પેપર છે, તો હું રિવિઝન કરતો હતો...' પિતા કહે છે, ‘કંઈ વાંધો નહિ, પેપર તો આવતા વર્ષે પણ અપાશે.’

એ યુવાન નહાવા માટે હાથમાં લીધેલો ટુવાલ મુકીને રોજના નિયમ પ્રમાણેની ૩૫ મિનિટ શારીરિક કસરત શરૂ કરે છે, કસરત પૂરી કરીને ફટાફટ નહાઈને તૈયાર થાય છે, ત્યારે એના પિતા સ્કૂટર ચાલુ રાખીને ઊભા છે, જીવનમાં પહેલીવાર એ યુવાનને એના પિતા કૉલેજ મૂકવા જાય છે, બાકી તો રોજ એ યુવાન સાઇકલ લઈને કૉલેજ જતો. એકદમ સમય પર એક્ઝામમાં પહોંચે છે અને પેપર આપે છે.

                                            ***