ધીરુબહેન પટેલ છે જ... ખરું કહું છું

પહેલી વાર્તા લખી ૧૫ વર્ષની વયે.. નામ આપ્યું ‘સંજોગ’

- સમીર ભટ્ટ

જગજનનીના મંગલસ્મિતને પેલે પાર

દેખાય છે તીવ્ર પ્રકાશમય ત્રિશૂળ..

સ્પર્શી લે એને

પ્રગટાવ તારી જાજ્વલ્યમાન માતૃપ્રતિભા

જેના સંતાન કહી શકે સદા

 સ્નેહાદરથી આ છે મારી મા!

                      (ધીરુબહેન પટેલ - છોળ અને છાલક)

આ એક લેખિકા કવિયત્રી નામે ધીરુબહેન પટેલ છે. આ કવિતા દ્વારા ગુજરાતી નારીને નવી જ ઓળખ આપતાં ધીરુબહેન. એ ગુજરાતી સ્ત્રી કે જે મંગલસ્મિત કરતી વાત્સલ્યભરી માતા છે, એને જરા ધીમેથી સૂચવે છે કે તીવ્ર પ્રકાશમય ત્રિશૂળને પણ અડકી લે.. આનો અર્થ એ કે નારી સ્મિત તો કરે જ, સાથે-સાથે જરૂર પડે ત્યારે રૌદ્ર રૂપ પણ પ્રગટાવી શકે તો સ્નેહાદર મળે.

બીજા એક ધીરુબહેન પટેલ છે. ધર્મજના પાણીદાર પટેલ કુટુંબમાં જન્મેલાં ચરોતરી ધીરુબહેન. ૧૯૨૬માં ગંગાબહેન નામના, દોઢ ચોપડીનું શિક્ષણ લઈને પરણી ગયેલાં અને સાસરે રહી ગુજરાતી, સંસ્કૃત અને અંગ્રેજીનો અભ્યાસ કરી, સત્યાગ્રહી તરીકે છ વખત જેલમાં જઈ આવેલ સન્નારીનાં પુત્રી ધીરુબહેન પટેલ. ગંગાબહેનના પતિ અને ધીરુબહેન પટેલના પિતા પણ અંગ્રેજી - ગુજરાતી પત્રકારત્વમાં સક્રિય હતા.