રાહુલની ભારત જોડો યાત્રાની ખરેખર ફલશ્રુતિ શું?

યાત્રાનો જાહેર થયેલ હેતુ ભારત જોડો હોવા છતાં, સૌ કોઈ જાણે છે કે આ સમગ્ર કવાયત રાહુલ ગાંધીની ઇમેજ બદલવા માટે કરવામાં આવી છે

રાહુલ ગાંધીની ભારત જોડો યાત્રાનું સમાપન થઈ ગયું છે. ૧૩૫ દિવસની આ યાત્રા દરમિયાન લગભગ ૩૯૦૦ કિલોમીટરનો પ્રવાસ તેમણે પૂર્ણ કર્યો. આ દિવસો દરમિયાન તેમની યાત્રામાં કુલ ૭૫ જિલ્લાને આવરી લેવામાં આવ્યા અને આ યાત્રા ૧૪ રાજ્યોમાંથી પસાર થઈ. આ યાત્રા દરમિયાન રાહુલ ગાંધીએ કુલ ૧૪ સભાઓને સંબોધન કર્યું અને ૧૩ પ્રેસ કોન્ફરન્સ કરી. આ ઉપરાંત, કેટલાક ઇન્ટરવ્યૂ પણ આપ્યા. કન્યાકુમારીથી કાશ્મીર સુધીની આ યાત્રા કોંગ્રેસ માટે કેટલી ફાયદાકારક બનશે, તેની ચર્ચા હવે થતી રહેશે. કોંગ્રેસને તેનાથી કેટલો રાજકીય લાભ થશે અથવા આ યાત્રાથી કોંગ્રેસને કેટલું રાજકીય માઇલેજ મળશે? એ અત્યારે સ્પષ્ટ થઈ શકે તેમ નથી.

૨૦૨૩ના વર્ષ દરમિયાન ૯ રાજ્યોમાં વિધાનસભાની ચૂંટણીઓ યોજાવાની છે અને આ ચૂંટણીનાં પરિણામો જ રાહુલ ગાંધીની યાત્રાની અસરનો સાચો અંદાજ આપી શકશે. યાત્રાની કેટલીક પોઝિટિવ બાજુ રહી હોવા છતાં, તેના રાજકીય લાભ માટે કોંગ્રેસ પાસે જે સંગઠનાત્મક માળખું જોઈએ તેનો અનેક રાજ્યોમાં અભાવ વર્તાય છે, એટલે આ યાત્રાના ફાયદાને મતમાં પરિવર્તિત કરવાનું કોંગ્રેસ માટે એટલું સરળ બનવાનું નથી.