ડેસ્ટિનેશન વેડિંગઃ ઘર જેવી મોકળાશ, સ્નેહીઓનો સંગાથ

લગ્ન એ દરેક વ્યક્તિ અને તેના પરિવારનો સૌથી યાદગાર પ્રસંગ હોય છે. આંગણે આવેલા આ રૂડા અવસરે યુવક કે યુવતી પોતાના જીવનસાથીને મેળવીને જિંદગીની નવી શરૂઆત કરે છે. સ્વાભાવિક છે કે આ પ્રારંભ ચિરસ્મરણીય બની રહે એવું સૌ કોઈ ઇચ્છે. એ રળિયામણી ક્ષણો નવદંપતી ઉપરાંત બંને પક્ષના કુટુંબીજનો માટે પણ એટલી મહત્ત્વપૂર્ણ હોય છે.

એક સમય હતો જ્યારે ઘર આંગણે જ લગ્નની તમામ વિધિઓ થતી. જ્ઞાતિ કે સમાજની વાડીઓ પણ આ પ્રસંગે ઉપયોગમાં લેવાતી, પણ એ હોય ઘર નજીક કે ગામ અથવા શહેરમાં જ. હવે સક્ષમ પરિવારો ઘર કે શહેરથી દૂર લગ્નપ્રસંગનું આયોજન કરતા થયા છે. આ પ્રસંગ કાયમી સંભારણું બની રહે એ માટે એનું આયોજન ક્યાં અને કેવી રીતે કરવું એ પણ લગ્નપ્રસંગે મહત્ત્વનું પાસું બની રહે છે.

ડેસ્ટિનેશન વેડિંગ વર્તમાન સમયમાં સૌથી વધુ ઊભરતો પ્રવાહ છે. હવે ક્લબો, પાર્ટી પ્લોટોમાં થતાં આયોજન ઓછાં થઈ રહ્યાં છે. સામાન્ય રીતે લોકો એ જોઈ જોઈને થાકી ગયા છે. હવે બધાને નવું જોઈએ છે. નવામાં તેમને ઘર જેવી મોકળાશ જોઈએ છે. એમના બાપદાદા જે રીતે નજીકના સગાંસંબંધીને આમંત્રીને પ્રસંગ યોજતા હતા, લોકોને હવે એ પરંપરા ગમવા લાગી છે. જેને નવી પેઢીએ ડેસ્ટિનેશન વેડિંગ નામ આપ્યું છે. મૂળ વાત એ છે કે પોતાના દોઢસો બસો કે ત્રણસો સગાં-સ્નેહીઓ પ્રસંગમાં હોય, એ સ્વજનોની જ હાજરીમાં એ લગ્નપ્રસંગ માણવાની રીત સાચી માનવા લાગ્યા છે. પહેલાં સમારંભોમાં ચાર હજાર લોકો થતાં, એ બે હજાર થયા, પછી હજાર લોકો થયા. લોકો બીજા માટે નહીં, પણ હવે લગ્નપ્રસંગને પોતાના અને પોતાના સ્વજનો પૂરતો મર્યાદિત કરવાની પ્રણાલી અપનાવવા લાગ્યા છે.