കഥയാണ് പ്രധാനം

‘ജീവിതം ഒരുപാട് മാറില്ലെന്ന് ഉറപ്പുളളതുകൊണ്ടാണ് ഞങ്ങൾ ഒരുമിച്ചത്... പരസ്പരബഹുമാനത്തോടെ മുന്നോട്ടുപോവുന്നു' നസ്രിയ നസീം

- അജ്മൽ പഴേരി

വീട്ടിലെ കുറുമ്പത്തിക്കുട്ടിയോട് തോന്നുന്ന അതേ ഇഷ്ടമാണ് മലയാളികൾക്ക് നസ്രിയ നസീമിനോട്. ഓം ശാന്തി ഓശാന'യിലെ പൂജയെയും ബാംഗ്ലൂർ ഡേയ്സി'ലെ കുഞ്ചുവിനെയും കൂടെയിലെ ജെന്നിയെയും മലയാളികൾ ഇഷ്ടത്തോടെ സ്വീകരിച്ചു.

ഇടേവളയ്ക്കുശേഷം ആഹാ സുന്ദരി' എന്ന തെലുങ്ക് ചിത്രത്തിലൂടെ നസ്രിയ തിരിച്ചുവരവ് നടത്തിയിരിക്കുന്നു.

“ഞാൻ ഇവിടെയൊക്കെയുണ്ട്. എവിടെയും പോയിട്ടില്ല. സിനിമയല്ലാതെ മറ്റൊന്നിനെക്കുറിച്ചും ആലോചിക്കുന്നില്ല. കുറേ കഥകൾ കേട്ടു. അതിൽ പലതും ഇഷ്ടപ്പെട്ടില്ല. അതുകൊണ്ട് മാത്രമാണ് രണ്ടോ മൂന്ന് വർഷത്തെ ഇടവേളയുണ്ടായത്. ലോക്ഡൗണിനിടെ ആഹാ സുന്ദരിയുടെ കഥ കേട്ടു. ഇഷ്ടപ്പെട്ടു. അങ്ങനെയാണ് ഈ സിനിമയിൽ അഭിനയിക്കാൻ തീരുമാനിച്ചത്, നസ്രിയ സംസാരിച്ചു തുടങ്ങി.

അഭിനയത്തിൽ തുടർച്ചയായി ഇടവേളകൾ സൃഷ്ടിക്കാൻ കാരണം? ഇടവേള തീരുമാനിച്ചെടുത്തതല്ല. ഇടയ്ക്കിടയ്ക്ക് കഥകൾ കേൾക്കാറുണ്ട്. ഇഷ്ടപ്പെടുന്നതിനോട് ഓക്കെ പറയും. ഇഷ്ടപ്പെട്ടത് കിട്ടിയില്ല എന്ന കാരണത്താൽ മാത്രമാണ് ഇടവേളകൾ വേണ്ടി വന്നത്. എന്നെ എക്സൈറ്റ് ചെയ്യിപ്പിക്കാത്ത, അല്ലെങ്കിൽ വ്യത്യസ്തത തോന്നിപ്പിക്കാത്ത ഒന്നിനോടും ഓക്കെ പറയാറില്ല. അങ്ങനെയാണ് ഇടവേളകളുണ്ടാകുന്നത്.

പുതിയ സിനിമയിൽ ഗൗരവക്കാരിയായി തോന്നി. പഴയ കുറുമ്പുകാരി നസ്രിയയെ കണ്ടില്ല...?