ప్లానింగ్ లేని లైఫ్ నాకిష్టం అనుపమ పరమేశ్వరన్

ఒక్కో సినిమాలో ఒక్కో రకంగా ప్రేక్షకులను అలరించేందుకు తపించే అందాల నాయిక అనుపమ పరమేశ్వరన్.

ఒక్కో సినిమాలో ఒక్కో రకంగా ప్రేక్షకులను అలరించేందుకు తపించే అందాల నాయిక అనుపమ పరమేశ్వరన్. ఒక ఆర్టిస్టుగా నిత్యం ఏదో ఒకటి నేర్చుకొని, నటనలో, గెటప్ లో కొత్తదనాన్ని చూపిస్తుంటేనే ప్రేక్షకుల ఆదరణ తరగకుండా అందుతూ ఉంటుందని బలంగా నమ్ముతున్న వ్యక్తి ఈమె. మలయాళంలో సూపర్ హిట్ 'ప్రేమమ్', తెలుగులో 'అఆ' చిత్రాలతో కెరీర్ మొదలుపెట్టిన అనుపమ దాదాపు ఏడేళ్లలో డజనుకిపైగా దక్షిణాది చిత్రాల్లో నటించారు. మంచి హిట్స్ వచ్చినప్పటికీ తానేమిటో నిరూపించుకో గలిగే చాలెంజింగ్ పాత్రలు ఇంకా రాలేదని తరచుగా చెబుతుండే ఈ కేరళ కుట్టిని అందరూ పక్కింటి అమ్మాయిలా ఫీలవుతుంటారు.అభిమానులతో సోషల్ మీడియా ద్వారా ఎంతో ఫ్రెండ్లీగా ఉంటూ తన సొంత భాష కంటే టాలీవుడ్లోనే ఎక్కువ చిత్రాలు చేసి తెలుగమ్మాయిలా ఇక్కడ కలిసి పోయారు.ఎప్పుడూ ఒకే రకమైన బోరింగ్ పాత్రలకు తానెంతో దూరమని సూటిగా చెబుతున్న అనుపమ పరమేశ్వరన్ ఇంటర్వ్యూ విశేషాలు...

ఈ ఏడేళ్లలో మీకు వచ్చిన పాత్రలు తృప్తినిచ్చాయా?

నటిగా నాకు సంతృప్తి నిచ్చే పాత్రలు ఇంకా రాలేదు. అలాంటి కథ, పాత్ర తెలుగులోనే వస్తాయని అనుకుంటున్నాను. నా భాష మలయాళమే అయినా ఎక్కువ అవకాశాలను, గుర్తింపుని, ఆదరణ అందించింది తెలుగు చిత్రరంగమే. టాలీవుడ్ నాకు ఇల్లు లాంటిది. నేనేమిటో నిరూపించుకునే చాలెంజింగ్ పాత్రలు భవిష్యత్తులో కచ్చితంగా వస్తాయి.

ఎలాంటి పాత్రలు ఆశిస్తున్నారు?

'మహానటి'లో కీర్తిసురేశ్ చేసిన పాత్రల్లాంటివి ఒక్కటి వచ్చినా చాలు. నా టాలెంట్ పూర్తిగా అలాంటి వాటిలోనే నిరూపించుకోగల్గుతాను. అప్పట్లో 'రంగ స్థలం'లో ఆ స్థాయి పాత్ర వచ్చింది. కానీ దురదృష్టవశాత్తు వదులుకున్నాను.