દિવ્યાંગોના જીવનમાં ખૂટતી સંજીવનીરૂપ કડીઓ

શારીરિક કે માનસિક ખોડખાંપણ સાથે જન્મતાં દરેક બાળકને આપણે વિશિષ્ટતાનું લેબલ આપીને સંતોષ માની લીધો છે. વાસ્તવમાં એમની કાળજી લેવા માટે અપેક્ષિત લક્ષ આપવામાં આવતું નથી. તેઓ પણ સામાન્ય મનુષ્યની જેમ સમાજમાં જીવી શકે એ માટે તેમના શિક્ષણની આગવી વ્યવસ્થા કરવી પડે છે, એવી વ્યવસ્થા છે, પણ સમયાનુસાર એમાં સુધારો થયો નથી. એમાંય મૂકબધિર બાળકોના શિક્ષણની દશા તો દયાજનક છે. કાબેલ શિક્ષકો અને યોગ્ય શિક્ષણ પદ્ધતિના અભાવે ગણિત-વિજ્ઞાન જેવા વિષયો ભણવા એમના માટે સ્વપ્નવત્ બની ગયા છે.

- ઇમરાન દલ

શિક્ષણ મેળવવું એ દરેક બાળકનો અધિકાર છે, આ અધિકાર મૂકબધિર સહિતનાં વિકલાંગ બાળકોને પણ મળેલો છે. એમને શિક્ષણ બે રીતે આપવામાં આવે છેઃ (૧) સંકલિત શિક્ષણ સામાન્ય શાળામાં દર અઠવાડિયે એમના સ્પેશિયલ શિક્ષક આવીને તેમને ભણાવે છે. (૨) સ્પેશિયલ શાળાઃ જ્યાં માત્ર વિકલાંગ બાળકોને જ ભણાવવામાં આવે છે.