ഒപ്പം നിന്നിട്ട് മിണ്ടാതെ മറയുന്നവർ

 ജീവിതത്തിൽ നിന്ന് പെട്ടെന്ന് ബന്ധം മുറിച്ച് ഒരാൾ മറഞ്ഞാലോ? ഇതുണ്ടാക്കുന്ന മാനസികാഘാതത്തെ എങ്ങനെ ശാസ്ത്രീയമായി നേരിടാം?

- ഡോ.അരുൺ ബി. നായർ പ്രഫസർ, മാനസികാരോഗ്യ വിഭാഗം, ഗവ.മെഡിക്കൽ കോളജ്, തിരുവനന്തപുരം.

കഴിഞ്ഞാഴ്ച വരെ എനിക്ക് മെസേജ് അയച്ചതാണ്. പെട്ടെന്നൊരു ദിവസം ഒരനക്കവുമില്ല. എല്ലാ സോഷ്യൽ മീഡിയാ അക്കൗണ്ടുകളിൽ നിന്നും അൺഫ്രണ്ട് ചെയ്തു. എന്താണു കാരണം എന്നു പോലും പറയാതെ ഒരടയാളവും ഇല്ലാതെ പോയി. ഞാനെന്തെങ്കിലും മോശമായി പെരുമാറിയിട്ടാണെങ്കിൽ അതെങ്കിലും തുറന്ന് പറയാമായിരുന്നു. എന്താണ് സംഭവിച്ചതെന്ന് ആർക്കറിയാം...

പലരുടെ ജീവിതത്തിൽ ഒരുതവണയെങ്കിലും സംഭവിച്ചിട്ടുണ്ടാകാം ഇതുപോലുള്ള അനുഭവങ്ങൾ. അതിന്റെ മാനസികാഘാതവും അനുഭവിച്ചിട്ടുമുണ്ടാകാം. അതുവരെയുള്ളതെല്ലാം മറന്ന് പെട്ടെന്ന് സകല ബന്ധവും മുറിച്ച് ഒരാൾ മറയുന്നു. ഇതിന് ഒറ്റവാക്കിൽ പറയുന്ന പേരാണ് "ഗോസ്റ്റിങ്.

വിനീത് കുമാർ സംവിധാനം ചെയ്ത "ഡിയർ ഫ്രണ്ട്' എന്ന സിനിമയ്ക്ക് ശേഷമാണ് "ഗോസ്റ്റിങ് കൂടുതൽ ചർച്ചാവിഷയമായത്. സോഷ്യൽ മീഡിയയിൽ പലരും അനുഭവക്കുറിപ്പുകളും എഴുതി. "ഗോസ്റ്റിങ് എന്താണെന്നും ജീവിതത്തിൽ അത്തരം അനുഭവം ഉണ്ടായാൽ എങ്ങനെ നേരിടണമെന്നും ശാസ്ത്രീയമായി മനസ്സിലാക്കാം.

എന്താണ് ഗോസ്റ്റിങ്

ഒരു ബന്ധത്തിൽ നിന്നൊരാൾ വിശദീകരണമില്ലാതെ അപ്രത്യക്ഷമാകുന്ന പ്രതിഭാസമാണ് ഗോസ്റ്റിങ്. ഗോസ്റ്റ് എന്ന് വാക്കിൽ നിന്നാണ് ഗോസ്റ്റിങ്ങിന്റെ വരവ്. 2017ൽ നിഘണ്ടുവിൽ എത്തിയ ഈ വാക്ക് ഡേറ്റിങ്ങുമായി ബന്ധപ്പെട്ടാണ് ഉപയോഗിച്ചിരുന്നത്. പക്ഷേ, സൗഹൃദത്തിലും പ്രണയത്തിലുമൊക്കെ ഇത് സംഭവിക്കാം.

എല്ലാ ഗോസ്റ്റിങ്ങും ഒരേ പോലെയാണോ?

ഗോസ്റ്റിങ് പല തരത്തിലുണ്ട്. ലൈറ്റ് വെയിറ്റ്, മിഡിൽ വെയിറ്റ്, ഹെവി വെയിറ്റ് എന്നിങ്ങനെ.

• ലൈറ്റ് വെയിറ്റ് ഗോസ്റ്റിങ് പരിചയപ്പെട്ട് ആഴത്തിലുള്ള ആത്മബന്ധം രൂപപ്പെടുന്നതിനു മുൻപാണ് ഇത് സംഭവിക്കുന്നത്. ഒരാൾ തുടക്കത്തിലേ ബന്ധത്തിൽ നിന്ന് മായുന്നതാണ് ലൈറ്റ് വെയിറ്റ് ഗോസ്റ്റിങ്.

• മിഡിൽ വെയിറ്റ് ഗോസ്റ്റിങ് പരിചയപ്പെട്ട് കുറച്ച് നാൾ പിന്നിട്ടു. കൂടുതൽ അടുത്തറിയുന്ന ഘട്ടത്തിലേക്ക് കടക്കാനൊരുങ്ങുമ്പോൾ ഒരാൾ "എക്സിറ്റ് ബട്ടൻ അമർത്തി ബന്ധത്തിൽ നിന്നു മായുന്നതാണ് മിഡിൽ വെയിറ്റ് ഗോസ്റ്റിങ്.

ഹെവി വെയിറ്റ് ഗോസ്റ്റിങ്: തീവ്രമായ ആത്മബന്ധം മുറിച്ച് മറയുന്നതാണിത്. അതുവരെയുള്ളതെല്ലാം മറന്ന് വിട പോലുമില്ലാതെ മായുമ്പോൾ മറ്റേയാൾ കടുത്ത മാനസിക സമ്മർദം വന്നേക്കാം.