ഇനിയുമുണ്ട് സ്വപ്‌നങ്ങൾ

അഭിനയ ജീവിതത്തിലെ  വിജയം കഠിനാദ്ധ്വാനമാണോ അനുഗ്രഹമാണോയെന്ന് ചോദിച്ചാൽ ഹണി റോസ് പറയു ന്നത് രണ്ടും ഒത്തു ചേർന്നുവരണം എന്നാണ്. സ്വന്തം പേരിനെ ബ്രാൻഡാക്കി മാറ്റി മലയാളസിനിമയിലും അന്യഭാഷകളിലും നിരവധി ആരാധകരെ സ്വന്തമാക്കി ഈ ഭാഗ്യ നായിക. 2005 ൽ പുറത്തിറങ്ങിയ ബോയ്ഫ്രണ്ട് എന്ന ചിത്രത്തിലൂടെ കടന്നു വന്ന ഹണിറോസിനെയല്ല മലയാളികൾ ഇന്ന് കാണുന്നത്. മൂലമറ്റം സ്ക്കൂളിൽ പഠിച്ച നാണം കുണുങ്ങിയായ പത്താം ക്ലാസുകാരിയിൽ നിന്ന് മമ്മൂട്ടിയുടെയും മോഹൻലാലിന്റെയുമൊക്കെ നായികയായി ന്യൂജൻ സിനിമകളുടെ ഭാഗമാവുകയും ചെയ്ത ഹണിക്ക് തെലുങ്കിലുൾപ്പെടെ ഇപ്പോൾ നിരവധി ആരാധകരാണുള്ളത്. 15 വർഷത്തോളമായി മലയാളസിനിമയിൽ സജീവമായി നിൽക്കുന്ന ഹണി റോസിന്റെ കരിയറിലും രൂപത്തിലും അടിമുടി മേക്കോവറാണിപ്പോൾ. ഹണിയുടെ പുതിയ വിശേഷങ്ങൾ.

- എ.കെ.എസ് 

ഹണിറോസ് എന്ന പേരിനോടുള്ള ഇഷ്ടം

 ചിലർക്കൊക്കെ വലുതാകുമ്പോൾ പേരൊന്നു മാറ്റിയാൽ കൊള്ളാമെന്ന് തോന്നാറുണ്ട്. എന്റെ കാര്യം നേരെ മറിച്ചാണ്. ഹണിറോസ് എന്ന പേര് എനിക്ക് ഏറ്റവും പ്രിയപ്പെട്ടതാണ്. അച്ഛനും അമ്മയും കഷ്ടപ്പെട്ട് കണ്ടുപിടിച്ച പേരാണത്. റോസ് എന്നത് അമ്മയുടെ പേരാണ്. ഞാൻ സ്കൂളിൽ പഠിക്കുന്ന സമയത്ത് പോലും വിരലിലെണ്ണാവുന്ന ആളുകൾ മാത്രമേ ഹണി എന്ന പേരിലുണ്ടായിരുന്നുള്ളൂ. ഒരുപാട് പ്രത്യേകതകളുള്ള പേരാണെന്ന് എനിക്ക് തോന്നാറുണ്ട്. വളരെ പോസിറ്റീവ് ആയ ഒരു എനർജിയും ഈ പേര് തരാറുണ്ട്. തെലുങ്കിൽ ചെന്നപ്പോൾ ഹണി എന്ന പേര് പറയാൻ അവർക്ക് ബുദ്ധിമുട്ടുണ്ടായിരുന്നു. അങ്ങനെയായിരുന്നു ധ്വനി എന്ന പേര് തീരുമാനിച്ചത്. അവരെന്നെ ഹണി എന്നല്ല വിളിക്കുന്നത്, അണി എന്നാണ്. പക്ഷേ എന്റെ പേര് ഞാൻ ഇനി ഒരിക്കലും മാറ്റില്ല എന്ന് തീരുമാനിച്ചിട്ടുണ്ട്.

സ്വന്തം പ്രയത്നത്തിൽ ഇവിടെ വരെ...

അപ്രതീക്ഷിതമായി സിനിമയിലേക്ക് വന്ന ആളല്ല ഞാൻ. കുട്ടിക്കാലം തൊട്ടുതന്നെ സിനിമ ചെയ്യണമെന്ന് ആഗ്രഹിച്ചിട്ടുണ്ട്. സിനിമാനടി ആകാൻ തന്നെയായിരുന്നു കുഞ്ഞിലേ മുതൽക്കുള്ള ആഗ്രഹം. പഠിക്കാൻ വലിയ മിടുക്കി ആയിരുന്നില്ല. ഒമ്പതാം ക്ലാസിൽ പഠിക്കുന്ന സമയത്താണ് ആദ്യമായി സിനിമയിലേക്ക് വരാനുള്ള അവസരം കിട്ടുന്നത്. പിന്നീട് പത്താം ക്ലാസൊക്കെ ഞാൻ വളരെ വൈകിയാണ് എഴുതിയെടുത്തത്. തുടർന്ന് ഡിസ്റ്റൻസ് എഡ്യൂക്കേഷൻ. വളരെ കാലമെടുത്താണ് പഠനം പൂർത്തിയാക്കിയത്. സമയമെടുത്ത് പതുക്കെയാണ് ഞാൻ ഡിഗ്രി എടുത്തതുപോലും.

ലാലേട്ടനൊപ്പമുള്ള അഭിനയമുഹൂർത്തങ്ങൾ