ഓറഞ്ച് മധുരമുള്ള ഗാക്പോ

റോബിൻ വാൻപേഴ്സിക്കും ആര്യൻ റോബനും ശേഷം ഹോളണ്ടിന് കിട്ടിയ മിന്നുന്ന സ്ട്രൈക്കറാണ് ഗാക്പോ. ഖത്തർ ലോകകപ്പിന്റെ കണ്ടെത്തൽ കൂടിയാണ് ഗാക്പോ

- സജ്ന ആലുങ്ങൽ

2018 ലോകകപ്പ് റഷ്യയിൽ നടക്കുമ്പോൾ കോഡി ഗാക്പോ എന്ന 19-കാരൻ നെതർലൻഡ്സിലെ ഐന്തോവനിലെ വീട്ടിലിരുന്നാണ് ഓരോ ദിവസത്തേയും മത്സരങ്ങൾ കണ്ടിരുന്നത്. അന്ന് അവൻ ഡച്ച് ക്ലബ്ബ് പി.എസ്. വി. ഐന്തോവന്റെ താരമായിരുന്നു. ടീമിന്റെ പരിശീലനം കഴിഞ്ഞ് കിട്ടുന്ന ഇടവേളകളിലായിരുന്നു ഈ മത്സരം കാണൽ. 

എന്നാൽ സ്വന്തം മാതൃരാജ്യം വിശ്വവേദിയിൽ കളിക്കുന്നില്ലല്ലോ എന്ന നോവ് അവന്റെ മനസിൽ അവശേഷിച്ചു. ഓരോ ടീമും വിജയം ആഘോഷിക്കുമ്പോൾ അവന്റെ മനസ് സങ്കടത്താൽ മൂടപ്പെട്ടു. ഓറഞ്ചിന്റെ മധുരമില്ലാത്ത ആ ലോകകപ്പിനെ അവന് ഉൾക്കൊള്ളാനാകുമായിരുന്നില്ല. ഇപ്പോഴിതാ നാല് വർഷങ്ങൾക്കിപ്പുറം നെതർലൻ ഡ്സ വിശ്വമേളയുടെ പ്രി ക്വാർട്ടർ ടിക്കറ്റുറപ്പിച്ചു. അതും അന്നത്തെ ആ 19-കാരന്റെ മൂന്നു മനോഹരമായ ഗോളുകളുടെ പിൻബലത്തിൽ ഗ്രൂപ്പിലെ രാജാക്കൻമാരായി. ഈ സന്തോഷം വാക്കുകളാൽ പറഞ്ഞറിയിക്കാനാകില്ലെന്നാണ് ഖത്തറിനെതിരായ അവസാന ഗ്രൂപ്പ് മത്സരവും വിജയിച്ച ശേഷം കോഡി ഗാക്പോ പറഞ്ഞത്.