രോഗശാന്തിയുടെ അവസാനവാക്ക്

തൃശൂർ റൗണ്ടിൽ നിന്നും രണ്ടര കിലോമീറ്ററാണ് ക്ഷേത്രത്തിലേക്കുള്ള ദൂരം

- ശ്രീകുമാർ ഗുരുവായൂർ (9447725649)

മഹാവിഷ്ണുവിന്റെ അവതാരരൂപമായ ശ്രീധന്വന്തരി മൂർത്തിയാണ് ആയുർവേദത്തിന്റെ അധിദേവനെന്ന് സങ്കൽപ്പം. രോഗശാന്തിയുടെ അവസാനവാക്കായാണ് ധന്വന്തരി ഭഗവാനെ ഭക്തർ കാണുന്നത്. ഏതസുഖം വന്നാലും ധന്വന്തര മൂർത്തിയെ ഉപാസിച്ചാൽ ആ രോഗത്തിന് പൂർണമായ ശമനമുണ്ടാകുമെന്നാണ് ഭക്തരുടെ വിശ്വാസം . പെരിങ്ങാവ് ധന്വന്തരി ക്ഷേത്രത്തിന്റെ പ്രാധാന്യവും അതാണ്.

ഒരു ദിവസം ശരീരം മുഴുവൻ പ്രണവുമായി ഒരാൾ ധന്വന്തരി ക്ഷേത്രത്തിൽ ഭഗവദ് ദർശനത്തിനായെത്തി. തന്റെ രോഗം പൂർണമായും ശമിപ്പിച്ചു തരണമെന്നയാൾ ദേവനോട് അകമഴിഞ്ഞു പ്രാർത്ഥിച്ചു. പ്രാർത്ഥിച്ചുകൊണ്ടുനിന്ന സമയത്ത് മേൽശാന്തി തീർത്ഥം നൽകി. ധന്വന്തരി മൂർത്തിയെ അഭിഷേകം ചെയ്ത ഭസ്മം മേൽശാന്തി അയാളുടെ കൈയിലേയ്ക്കിട്ടു കൊടുത്തു കൊണ്ടു പറഞ്ഞു: "ഈ ഭസ്മം ഒരു നുള്ള് വായിലിട്ടു നുണയുക. ബാക്കിയുള്ളത് വ്രണമുള്ള ഭാഗങ്ങളിൽ തൂവുക.'അയാൾ മേൽശാന്തി പറഞ്ഞതുപോലെ ചെയ്തു.

“നിങ്ങൾ പുറത്തു പോയി അവിടെ ഇരിക്കൂ. ഇന്നു മുക്കുടി നിവേദ്യമുള്ള ദിവസമാണ്.

പതിനൊന്നു മണികഴിയുമ്പോൾ അത് ഭക്തർക്ക് നൽകും. ആ നിവേദ്യം നിങ്ങൾ വാങ്ങി കഴിക്കൂ... എല്ലാത്തിനും ശമനമുണ്ടാകും.' മേൽശാന്തി അയാൾക്ക് ഉപദേശം നൽകി.

അയാൾ പുറത്തേയ്ക്ക് കടന്ന് മറ്റു ഭക്തർക്കൊപ്പം അവിടെയിരുന്നു. എല്ലാ മലയാള മാസത്തേയും ആദ്യത്തെ വ്യാഴാഴ്ച ധന്വന്തരി ക്ഷേത്രത്തിൽ മുക്കുടി നിവേദ്യം നേദിക്കാറുണ്ട്. നട അടച്ചശേഷം അതു ഭക്തർക്ക് വിതരണം ചെയ്യും. അന്നത്തെ ദിവസം മലയാള മാസത്തിലെ ആദ്യ വ്യാഴാഴ്ചയായിരുന്നു.

ഭഗവാനെ തൊഴുതു മടങ്ങിയ ആരോഗി ഒരാഴ്ചയ്ക്കു ശേഷം വീണ്ടും ധന്വന്തരി ഭഗവാനു മുന്നിലെത്തുമ്പോൾ അയാളുടെ അസുഖം പൂർണമായി മാറിയിട്ടുണ്ടായിരുന്നു.