ബ്രാഹ്മമുഹൂർത്തത്തിന്റെ പ്രാധാന്യം

ഭാരതത്തിൽ വികസിച്ചുവന്ന ആർഷ സംസ്ക്കാരത്തിന്റെ സ്വാഭാവികമായ പേരാണ് ഹിന്ദുമതമെന്ന സനാതനധർമ്മം.

- കെ.മോഹനൻ വെള്ളായണി ഫോൺ: 9495303081

സൂര്യോദയത്തിന് ഏഴരനാഴികയ്ക്ക് മുൻപാണ് ബ്രാഹ്മ മുഹൂർത്തം ആരംഭിക്കുന്നത്. ഒരു മണിക്കൂർ, രണ്ടര നാഴികയാണ്. ഏഴരനാഴിക എന്നുപറയുന്നത് മൂന്ന് മണിക്കൂറിന് തുല്യമായ സമയമാണ്. രാവിലെ ആറുമണിക്കാണ് സൂര്യോദയമെങ്കിൽ വെളുപ്പിന് മൂന്ന് മണിക്ക്(3 am) ബ്രാഹ്മ മുഹൂർത്തം തുടങ്ങുന്നു. ആറരമണിക്കാണ് സൂര്യോദയമെങ്കിൽ വെളുപ്പിന് മൂന്നരമണിക്ക്(3.30 am) ബ്രാഹ്മമുഹൂർത്തം തുടങ്ങും. ഇത് നിത്യവും ഉള്ള മുഹൂർത്തമാണ്. ഇതിന് പഞ്ചാംഗ വിഷയങ്ങളും ഗ്രഹസ്ഥിതിയും ബാധകമല്ല. ബ്രാഹ്മമുഹൂർത്തസമയം ഇരുട്ടിന്റെ തമോഗുണം അകന്ന് ദിവ്യമായ സത്വഗുണം ആരംഭിക്കുന്നു. പ്രകൃതി ശാന്തവും നിർമ്മലവും ആയിരിക്കും. കുളിർതെന്നൽ വീശുന്നു. പക്ഷികൾ ഉറക്കമുണർന്ന് പാട്ടുപാടാൻ തുടങ്ങുന്നു. മനു ഷ്യശരീരം ആലസ്യത്തിൽ നിന്നുണർന്ന് സാത്വിക ഭാവത്തിലൂടെ കർമ്മത്തിലേക്ക് പ്രവേശിക്കുന്നു. ബുദ്ധിശക്തി ഉണർന്ന് പ്രവർത്തിക്കുന്നു. തമോഗുണം ഉള്ളവർ ഉറക്കം തുടരുന്നതിനാൽ അവരിൽ നിന്നുള്ള അപശബ്ദതരംഗങ്ങൾ ആരെയും അലോസരപ്പെടുത്തുന്നില്ല.

സമയകാലത്തിനും സത്വരജോതമോഗുണങ്ങൾ ഉണ്ട്. സൂര്യോദയം മുതൽ സൂര്യാസ്തമയം വരെയുള്ള മുപ്പതുനാഴിക രജോഗുണം. സൂര്യാസ്തമയം മുതൽ വെളുപ്പാൻ കാലം മൂന്നു മണി വരെയുള്ള ഇരുപത്തിരണ്ടര നാഴിക തമോഗുണം. വെളുപ്പാൻ കാലം മൂന്ന് മണിമുതൽ സൂര്യോദയം വരെയുള്ള ഏഴര നാഴിക സത്വഗുണം. അപ്പോഴാണ് ബ്രാഹ്മമുഹൂർത്തം. ഉണർവ് സത്വഗുണമായും ദിന പ്രവൃത്തികൾ രജോഗുണമായും ഉറക്കം തമോഗുണമായും നമ്മുടെ ശരീരത്തിൽ പ്രകടകമാകുന്നു.

ബ്രാഹ്മം എന്നാൽ ബ്രഹ്മത്തെ സംബന്ധിക്കുന്നത്. മുഹൂർത്തം എന്നാൽ ശുഭസമയം. ബ്രഹ്മം എന്നത് പരബ്രഹ്മം തന്നെയാണ്. അതാണ് ഈശ്വരീയ ഭാവം. ഇതാണ് ബ്രഹ്മ ജ്ഞാനത്തിന് വേണ്ടിയുള്ള സമയം.