குடும்பத்தில் ஒரு பெண் படித்தால், நான்கு ஆண்கள் படித்ததற்குச் சமம்!

கோட்டூர் பாலசுப்பிரமணியன்- ருக்மணி அரங்கத்தைத் திறந்து வைத்து தமிழர் தலைவர் ஆசிரியர் விளக்கவுரை

கோட்டூர் பாலசுப்பிரமணியன் நூற்றாண்டு விழா!

கோட்டூர் அரசுப் பள்ளியில் 27 ஆசிரியர்களில் 26 பேர் பெண்கள்!
10 ஆம் வகுப்பு பொதுத் தேர்வு - 12 ஆம் வகுப்புப் பொதுத் தேர்வுகளில் பெண்களே முதலிடம்!

கோட்டூர் பாலசுப்பிரமணியன் நூற்றாண்டு விழா - கோட்டூர் அரசுப் பள்ளியில் 27 ஆசிரியர்களில் 26 பேர் பெண்கள்! 10 ஆம் வகுப்பு பொதுத் தேர்வு - 12 ஆம் வகுப்புப் பொதுத் தேர்வுகளில் முதலிடம் பெண்களே! ஒரு குடும்பத்தில் ஒரு பெண் படித்தால், நான்கு ஆண்கள் படித்ததற்குச் சமம் என்று தந்தை பெரியார் அவர்கள் சொன்னதை எடுத்துக்காட்டி விளக்கவுரையாற்றினார் திராவிடர் கழகத் தலைவர் தமிழர் தலைவர் ஆசிரியர்  கி. வீரமணி அவர்கள்.

கடந்த 12.7.2023 அன்று மாலை தஞ்சாவூர் சாலை, மன்னார்குடியில் உள்ள பி.பி.மகாலில் நடைபெற்ற பெரியார் பெருந்தொண்டர் கோட்டூர் வீ.பாலசுப்ர மணியன் நூற்றாண்டு விழாவிற்குத் தலைமையேற்று திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் உரையாற்றினார்.

அவரது தலைமையுரை வருமாறு:

கோட்டூர் எத்தனையோ சாதனைகளைச் செய்திருக்கிறது

இந்தக் கோட்டூர் எத்தனையோ சாதனைகளைச் செய்திருக்கிறது. இங்கே நம்முடைய சட்டமன்ற உறுப்பினர் அய்யா மாரிமுத்து அவர்கள் குறிப் பிட்டதைப் போல, ஒரு புரட்சி பூமி இது.

அப்படிப்பட்ட புரட்சி வெடிக்கின்ற, சிவப்பும் - கருப்பும் கலந்த சூழ்நிலையில், அற்புதமான ஓர் அரசு பள்ளியில் சிறப்பான அறிவு விருந்து காலையிலிருந்து நடைபெற்றுக்  கொண்டிருக்கின்ற இந்த நிகழ்ச்சிக்குத் தலைமை ஏற்று இருக்கக்கூடிய பெற்றோர் ஆசிரியர் சங்கத் தலைவரும், அன்பிற்கும், பாராட்டுதலுக்கும் உரிய அம்மையார் திருமதி.இரா.அம்புஜம் அவர்களே,

எளிமையின் சின்னம் - தொண்டின் உருவம் தொண்டறத் தோழர்

சட்டப்பேரவை உறுப்பினர், இங்கே நண்பர்களும், அறிமுக உரையாளர்களும் சொன்னதைப்போல, எளிமையின் சின்னமாக, தொண்டின் உருவமாக, தொண்டறத் தோழராக இருக்கக்கூடிய அருமைக்குரிய திருத்துறைப்பூண்டி சட்டமன்ற உறுப்பினர் - இத்தொகுதிக்கு உரியவர் அய்யா தோழர் மாரிமுத்து அவர்களே,