வேளாண் வளர்ச்சித் திட்டம் செயல்பாடுகள் குறித்து ஆட்சியர் ஆய்வு

மதுரை மாவட்டம், வாடிப்பட்டி வட்டத்திற்கு உட்பட்ட மேலக்கால் கிராமத்தில் செயல் படுத்தப்பட்டுள்ள கலைஞரின் அனைத்து கிராம ஒருங்கிணைந்த வேளாண் வளர்ச்சித் திட்டம் செயல்பாடுகள் குறித்து மாவட்ட ஆட்சித்தலைவர் மா.சௌ.சங்கீதா, செய்தியாளர்களுடன் சுற்றுப் பயணம் மேற்கொண்டு நேரடியாக ஆய்வு மேற்கொண்டார்.

தொடர்ந்து, மாவட்ட ஆட்சித் தலைவர் மா.சௌ.சங்கீதா, செய்தியாளர்களிடம் தெரிவித்ததாவது: தமிழ்நாடு அரசு விவசாயிகள் நலனுக்காக வேளாண்மை மற்றும் உழவர் நலத்துறை சார்பாக பல்வேறு திட்டங்களை செயல்படுத்தி வருகிறது. அந்த வகையில், அனைத்து கிராமங்களிலும் ஒட்டு மொத்த வேளாண் வளர்ச்சியை உருவாக்கி தன்னிறைவு பெற்ற கிராமங்களாக மேம்படுத்திடும் நோக்கில் கலைஞரின் அனைத்து கிராம ஒருங்கிணைந்த வேளாண் வளர்ச்சித் திட்டம் செயல்படுத்தப் பட்டு வருகிறது. குறிப்பாக, வேளாண்மைத்துறை, வேளாண் பொறியியல் துறை. தோட்டக்க லைத்துறை, ஊரக வளர்ச்சித்துறை, வேளாண் வணிகம் மற்றும் விற்பனை, விதை சான்றளிப்புத் துறை, வருவாய்த்துறை உள்ளடக்கிய 15 துறைகளைக் கொண்டு திட்டப்பணிகள் செயல்படுத்தப் பட்டு வருகிறது.

மதுரை மாவட்டத்தில் கலைஞரின் அனைத்து கிராம ஒருங்கிணைந்த வேளாண் வளர்ச்சித்திட்டம், 2021-2022ஆம் ஆண்டில் 58 கிராம பஞ்சாயத்துகளிலும், 2022-23ஆம் ஆண்டில் 112 கிராம பஞ்சாயத்துகளிலும் என கடந்த இரண்டு நிதியாண்டுகளில் 170 கிராம பஞ்சாயத்துகளில் ரூ.142.301 இலட்சம் மதிப்பீட்டில் வேளாண்மை துறை திட்டங்கள் செயல்படுத்தப்பட்டு 78,033 பயனாளிகள் பயனடைந்துள்ளனர்.