ரமலான் பண்டிகை: சிவகங்கை, ராமநாதபுரம் மாவட்டங்களில் இஸ்லாமியர்கள் சிறப்புத் தொழுகை

ரமலான் பண்டிகையையொட்டி சிவகங்கை, ராமநாதபுரம் மாவட்டங்களில் இஸ்லாமியர்கள் திங்கள்கிழமை சிறப்புத் தொழுகை நடத்தினர்.

- 

சிவகங்கை/மானாமதுரை/திருப்பத்தூர்/காரைக்குடி/ராமேசுவரம்/திருவாடானை, மார்ச் 31: ரமலான் பண்டிகையையொட்டி சிவகங்கை, ராமநாதபுரம் மாவட்டங்களில் இஸ்லாமியர்கள் திங்கள்கிழமை சிறப்புத் தொழுகை நடத்தினர்.

சிவகங்கை நகரில் வசிக்கும் இஸ்லாமியர்கள் ஒன்று கூடி சிவகங்கை-மதுரை சாலையில் அமைந்துள்ள ஈத்கா தொழுகை திடலில் ரமலான் சிறப்புத் தொழுகை நடத்தினர். முன்னதாக, சிவகங்கை நேரு பஜாரில் உள்ள வாலாஜா நவாப் ஜும்ஆ பள்ளிவாசலில் இருந்து பள்ளிவாசல் தலைவர் காஜா முஹைதீன் தலைமையில் ஊர்வலமாக ஈத்கா திடலை வந்தடைந்தனர். அங்கு மௌலவி சுல்தான் ஹயிரி சொற்பொழிவாற்றினார். சிறப்புத் தொழுகையை தலைமை இமாம் மௌலவி முஹம்மது பிலால் நடத்தினார். மௌலவி மன்சூர் ஹுசேன் சிறப்பு பிரார்த்தனையை தொடங்கிவைத்தார். இதில் திரளான இஸ்லாமியர்கள் பங்கேற்றனர். ரமலான் பண்டிகையையொட்டி, நேரு பஜாரிலிருந்து மதுரை சாலையில் உள்ள ஈத்கா மைதானம் வரை ஏராளமான போலீஸார் பாதுகாப்புப் பணியில் ஈடுபட்டனர்.

இதேபோன்று, காரைக்குடி, நாட்டரசன்கோட்டை, நெற்குப்பை, சிங்கம்புணரி, திருப்பத்தூர், மானாமதுரை, திருப்புவனம், பழையனூர், புழுதிப்பட்டி, தேவகோட்டை, இளையான்குடி, காளையார்கோவில், நெற்குப்பை, பூலாங்குறிச்சி, கல்லல், திருப்புவனம் உள்ளிட்ட பகுதிகளில் உள்ள பள்ளிவாசல்களில் ரமலான் பண்டிகையையொட்டி, அந்தந்தப் பகுதிகளில் வாழும் இஸ்லாமியர்கள் சிறப்புத் தொழுகையில் ஈடுபட்டனர். தொழுகைக்குப் பிறகு, ஒருவருக்கொருவர் ஆரத்தழுவி ரமலான் வாழ்த்துகளைப் பரிமாறிக் கொண்டனர்.