முதலீடுகளைக் குவிக்கும் தமிழ்நாடு

சிறந்த உள்கட்டமைப்பு, அமைதியான சூழல், திறமையான மனிதவளம் உள்ளிட்ட காரணங்களால் தமிழ்நாட்டில் முதலீடுகள் குவிகின்றன என்று லண்டனில் நடைபெற்ற நிகழ்ச்சியில் முதல்வர் மு.க.ஸ்டாலின் பெருமிதம் தெரிவித்தார்.

- 

சென்னை, செப். 7:

தமிழ்நாட்டுக்கு முதலீடுகளை ஈர்ப்பதற்காக வெளிநாடு சுற்றுப்பயணம் மேற்கொண்டுள்ள முதல்வர் ஸ்டாலின், லண்டனில் நடைபெற்ற மாபெரும் தமிழ்க் கனவு - பிரிட்டன்வாழ் தமிழர்கள் சந்திப்பு நிகழ்ச்சியில் பேசியதாவது:

தமிழர்கள் அறிவில் சிறந்தவர்கள், கடுமையான உழைப்பாளிகள் என்பதை வெளிநாடுவாழ் தமிழர்கள் நிரூபித்து வருகின்றனர். தமிழர்கள் எங்கு சென்றாலும் நம்முடைய மொழி, பண்பாடு மட்டுமல்லாமல், சுயமரியாதை, சமத்துவம், சமூகநீதிக் கோட்பாடு ஆகியவற்றைக் கைவிட மாட்டோம் என்ற நிலைப்பாட்டில் இருப்பது பாராட்டுக்குரியது.

தமிழர்கள் அயல்நாடுகளில் வசித்து வந்தாலும், தங்களது குழந்தைகளுக்கு தமிழ்ப் பெயர்களை வைப்பதுடன், தமிழ் உணர்வையும் ஊட்டி வளர்க்கின்றனர். இதையெல்லாம் பார்க்கும்போது, தமிழுக்குத் தீங்கு நினைக்கும் யாருடைய எண்ணமும் ஒருபோதும் நிறைவேறாது என்ற எண்ணம் வலுப்பெறுகிறது.