கோவையில் உலகத் தரத்தில் செம்மொழிப் பூங்கா

முதல்வர் மு.க.ஸ்டாலின் திறந்து வைத்தார்

- 

கோவையில் ரூ.208.50 கோடியில் உலகத் தரத்தில் புதிதாகக் கட்டப்பட்டுள்ள செம்மொழிப் பூங்காவை முதல்வர் மு.க. ஸ்டாலின் செவ்வாய்க்கிழமை (நவ. 25) திறந்து வைத்தார்.

கோவையில் கடந்த 2010-ஆம் ஆண்டு நடைபெற்ற உலகத் தமிழ் செம்மொழி மாநாட்டில், கோவையில் செம்மொழிப் பூங்கா அமைக்கப்படும் என்று அப்போதைய முதல்வர் கருணாநிதி அறிவித்தார். ஆட்சி மாற்றம் ஏற்பட்ட பின்னர் இந்தத் திட்டம் கிடப்பில் போடப்பட்டது. கடந்த 2021-இல் முதல்வராக மு.க. ஸ்டாலின் பொறுப்பேற்றதும் இந்தத் திட்டப் பணிகள் வேகமெடுத்தன.

அதன்படி, கோவை காந்திபுரம் மத்திய சிறைச்சாலை வளாகத்தில் 165 ஏக்கர் பரப்பளவிலான நிலத்தில் முதல் கட்டமாக 45 ஏக்கர் பரப்பளவில் ரூ.208.50 கோடியில் செம்மொழிப் பூங்கா அமைக்கும் பணிகளுக்கு கடந்த 2023 டிச. 18-இல் முதல்வர் மு.க.ஸ்டாலின் அடிக்கல் நாட்டினார். இந்தப் பணிகள் நிறைவடைந்ததைத் தொடர்ந்து செம்மொழிப் பூங்காவை முதல்வர் மு.க. ஸ்டாலின் செவ்வாய்க்கிழமை திறந்து வைப்பார் என அறிவிக்கப்பட்டிருந்தது.

விமான நிலையத்தில் உற்சாக வரவேற்பு: இதற்காக, முதல்வர் மு.க.ஸ்டாலின் சென்னையில் இருந்து விமானம் மூலமாக செவ்வாய்க்கிழமை காலை 11.45 மணிக்கு கோவை விமான நிலையம் வந்தடைந்தார். அங்கு அவரை அமைச்சர்கள் உள்ளிட்ட முக்கியப் பிரமுகர்கள் வரவேற்றனர்.