நடிகர் ராஜேஷ் (75) காலமானார்

நடிகர் ராஜேஷ் (75) குறைந்த ரத்த அழுத்தம் காரணமாக ஏற்பட்ட உடல்நிலை பாதிப்பால் சென்னையில் வியாழக்கிழமை காலமானார்.

- 

சென்னை, மே 29:

நடிகர் ராஜேஷின் உடல் ராமாபுரத்தில் உள்ள அவரது இல்லத்தில் பொதுமக்கள் அஞ்சலிக்காக வைக்கப்பட்டது. முதல்வர் மு.க.ஸ்டாலின், துணை முதல்வர் உதயநிதி ஸ்டாலின் உள்பட பலர் நேரில் சென்று ராஜேஷின் உடலுக்கு அஞ்சலி செலுத்தினர்.

மேலும், திரைத்துறையினர் பலர் அஞ்சலி செலுத்திய நிலையில், அவரது உடல் போரூரில் உள்ள தனியார் மருத்துவமனையில் வைக்கப்பட்டுள்ளது.

ராஜேஷின் மகள் வெளிநாட்டில் இருப்பதால் இறுதிச் சடங்கு ஜூன் 1-ஆம் தேதி (ஞாயிற்றுக்கிழமை) காலை 11 மணிக்கு நடைபெறும் என தெரிவிக்கப்பட்டுள்ளது.

இரங்கல்: நடிகர் ராஜேஷின் மறைவுக்கு ஆளுநர் ஆர்.என்.ரவி, முதல்வர் மு.க.ஸ்டாலின் மற்றும் பல்வேறு அரசியல் கட்சிகளின் தலைவர்கள், திரைப்பிரபலங்கள் இரங்கல் தெரிவித்துள்ளனர்.

ஆளுநர் ஆர்.என்.ரவி: மூத்த நடிகர் ராஜேஷ் மறைவால் ஆழ்ந்த வருத்தம் அடைந்தேன். அவரது குறிப்பிடத்தக்க பன்முகத்தன்மை பல தசாப்தங்களாக தமிழ் சினிமாவை வளப்படுத்தியது. அவரது குடும்பத்தினர், நண்பர்கள், ரசிகர்களுக்கு நெஞ்சார்ந்த இரங்கல்.