மரபணுவில் செய்யறிவின் கையொப்பம்!

உடலின் செல் ஒவ்வொன்றிலும் கடவுளின் கையொப்பம் இருப்பதாகச் சொல்கிறார்கள். 'கடவுளின் கையொப்பம்' (தி சிக்னேச்சர் ஆஃப் காட்) என்று நூலும் வந்திருக்கிறது.

- முனைவர் ம. இராசேந்திரன்

கடவுளின் கையொப்பத்தை வெளிப்படுத்துகிறது அறிவியல் (சயின்ஸ் அன்கவர்ஸ் தி சிக்னேச்சர் ஆஃப் காட்) என்று சென்னைப் பல்கலைக்கழகப் பதிவாளர் முனைவர் ரீட்டா ஜான் எழுதியுள்ள நூல் சொல்கிறது.

உடலின் ஒவ்வொரு செல்லிலும் இருக்கிறது மரபணு. மரபின் தகவல்களைக் கொண்டிருப்பது மரபணு. உயிர் இருக்கிற/ இருந்த எல்லாவற்றிலும் இருக்கிறது மரபணு. மரபணுக்கள் நிலம், பொழுது, சூழல் எனும் இயற்கையால் கட்டமைக்கப்பட்டிருக்கின்றன.

கடவுளின் கையொப்பம் உடலில் இருக்கிறதா?, உயிரில் இருக்கிறதா?, உயிர் இல்லாதவற்றிலும் இருக்கிறதா?

"நீரைப் பழைய நெருப்பில் குளிர்வித்தான்" என்று கடவுளின் சாதனையைச் சொல்கிறார் மகாகவி பாரதியார். பழைய நெருப்பு சூரியனிலிருந்து வந்த பூமி. பெருவெடிப்புக்கு முந்தைய ஊழியை, "விசும்பில் ஊழி ஊழ் ஊழ் செல்லக் கருவளர் வானத்து இசையில் தோன்றி" என்று திருமால் பெருமையை ஊழிகளின் தோற்றத்தில் சொல்கிறார் பரிபாடலில் கீரந்தையார்.

"நான் நீரில் சுவை; குந்தி மகனே, நான் ஞாயிற்றிலும் திங்களிலும் ஒளி; எல்லா வேதங்களிலும் நான் பிரணவம்; வானில் ஒலி நான்" என்று மகாகவி பாரதியார் மொழிபெயர்த்த பகவத்கீதை ஏழாவது அத்தியாயம் சொல்கிறது.

புல் ஆய், பூடு ஆய், புழு ஆய், மரம் ஆகி, பல் விருகம் ஆகி, பறவை ஆய், பாம்பு ஆகி, கல் ஆய், மனிதர் ஆய், பேய் ஆய், கணங்கள் ஆய், வல் அசுரர் ஆகி, முனிவர் ஆய், தேவர் ஆய், செல்லாஅநின்ற இத் தாவர சங்கமத்துள், எல்லாப் பிறப்பும் பிறந்து இளைத்தேன்; எம்பெருமான்! என்று பிறப்பின் பட்டியலில் கல்லையும் சேர்த்திருக்கிறார் மாணிக்கவாசகர். அணுவுக்கும் நுண்ணியது. பெரியதைக் காட்டிலும் பெரியது. அத்தகைய ஆத்மா உயிர்களின் குகையில் வாழ்கிறது என்று கடோபநிடதம் சொல்கிறது.

செல்களின் இயக்கத்தில் இயற்கையாகக் காணப்படும் ஒழுங்கும் துல்லியமும் வியப்படையச் செய்கின்றன. ஆகவே, சிலர் இதைக் கடவுளின் கையொப்பமாகப் பார்க்கிறார்கள். அறிவியல் இதை இயற்கையின் ஆயிரக்கணக்கான ஆண்டுகளின் பரிணாம வளர்ச்சியாகப் பார்க்கிறது.

உயிர் இருந்த/இருக்கிற செடி, கொடிகள் முதல் பறவை, விலங்கு மனிதர்கள் வரை மரபணு இருக்கிறது; மரபணுவைக் கொண்டுதான் உயிரினங்களை அடையாளம் காண முடிகிறது.